മോസ്കോ – മൂന്നാം ലോക മഹായുദ്ധം ഇതുവരെ ഔദ്യോഗികമായി ആരംഭിച്ചിട്ടില്ലെന്നും, എന്നാല് യു.എസ് പ്രസിഡന്റ് ഡൊണാള്ഡ് ട്രംപ് തന്റെ ഭ്രാന്തന് നയങ്ങള് തുടര്ന്നാല് ഏത് നിമിഷവും അത് പൊട്ടിപ്പുറപ്പെടാമെന്നും മുന് റഷ്യന് പ്രസിഡന്റ് കൂടിയായ റഷ്യന് സുരക്ഷാ കൗണ്സില് ഡെപ്യൂട്ടി ചെയര്മാന് ദിമിത്രി മെദ്വദേവ് പറഞ്ഞു. മൂന്നാം ലോക മഹായുദ്ധം ഇതിനകം ആരംഭിച്ചിട്ടുണ്ടോ എന്ന ചോദ്യത്തിന്, ഔദ്യോഗികമായി ഇല്ല എന്ന് മെദ്വദേവ് അഭിപ്രായപ്പെട്ടു. എന്നാല് ട്രംപ് രാഷ്ട്രീയ ഭരണകൂടങ്ങളെ ക്രിമിനല് രീതിയില് മാറ്റുന്ന തന്റെ ഭ്രാന്തന് പാത തുടര്ന്നാല്, അത് അനിവാര്യമായും ആരംഭിക്കും. ഏത് സംഭവവും മൂന്നാം ലോക യുദ്ധത്തിന് തിരികൊളുത്താം. ഏത് സംഭവവും എന്തുതന്നെയായാലും – ദിമിത്രി മെദ്വദേവ് പറഞ്ഞു.
തലസ്ഥാനമായ തെഹ്റാന് ഉള്പ്പെടെയുള്ള ഇറാന് പ്രദേശങ്ങളിലെ ലക്ഷ്യങ്ങളില് കഴിഞ്ഞ ശനിയാഴ്ച യു.എസും ഇസ്രായിലും ആക്രമണം ആരംഭിച്ചതിനു പിന്നാലെയാണ് റഷ്യന് നേതാവിന്റെ പ്രസ്താവന പുറത്തുവന്നത്. ഇറാനില് വ്യാപകമായ നാശവും സിവിലിയന് നാശനഷ്ടങ്ങളും റിപ്പോര്ട്ട് ചെയ്യപ്പെട്ടിട്ടുണ്ട്. ഇതിന് തിരിച്ചടിയായി ഇസ്രായിലിലും മിഡില് ഈസ്റ്റിലെ യു.എസ് സൈനിക താവളങ്ങള് ലക്ഷ്യമിട്ടും ഇറാന് പ്രതികാര ആക്രമണങ്ങള് നടത്തുന്നു.
ഇറാന് ആണവ പദ്ധതിയെ കുറിച്ച് അമേരിക്കയും ഇറാനും തമ്മില് ചര്ച്ചകള് നടന്നുകൊണ്ടിരിക്കെയാണ് ഇസ്രായിലും അമേരിക്കയും ചേര്ന്ന് ഇറാനില് ആക്രമണങ്ങള് ആരംഭിച്ചത്. അവസാന റൗണ്ട് ചര്ച്ചകള് ഫെബ്രുവരി 26 ന് ജനീവയില് നടന്നു. ആക്രമണത്തില് ഇറാന് പരമോന്നത നേതാവ് ആയത്തുല്ല അലി ഖാംനഇ അടക്കമുള്ള നേതാക്കള് കൊല്ലപ്പെട്ടു.
ഖാംനഇയുടെ കൊലപാതകം മനുഷ്യ ധാര്മ്മികതയുടെയും അന്താരാഷ്ട്ര നിയമത്തിന്റെയും എല്ലാ മാനദണ്ഡങ്ങളുടെയും നഗ്നമായ ലംഘനമാണെന്ന് റഷ്യന് പ്രസിഡന്റ് വ്ളാഡിമിര് പുട്ടിന് പ്രസ്താവിച്ചു. യു.എസ്-ഇസ്രായില് ആക്രമണത്തെ റഷ്യന് വിദേശ മന്ത്രാലയം അപലപിക്കുകയും സംഘര്ഷം ഉടന് കുറക്കാനും ശത്രുത അവസാനിപ്പിക്കാനും ആവശ്യപ്പെടുകയും ചെയ്തു.
ആവശ്യമെങ്കില് ഇറാനിലേക്ക് യു.എസ് കരസേനയെ അയക്കുന്നത് തള്ളിക്കളയുന്നില്ലെന്ന് യു.എസ് പ്രസിഡന്റ് ഡൊണാള്ഡ് ട്രംപ് തിങ്കളാഴ്ച ന്യൂയോര്ക്ക് പോസ്റ്റിനോട് പറഞ്ഞു. കരസേനയെ അയക്കുന്നതില് എനിക്ക് മടിയൊന്നുമില്ല. എല്ലാ പ്രസിഡന്റുമാരും പറയുന്നതുപോലെ കരസേന ഉണ്ടാകില്ല എന്ന് ഞാന് പറയുന്നില്ല. ആവശ്യമെങ്കില് കരസേനയെ അയക്കുന്ന കാര്യം താന് പരിഗണിക്കുമെന്നും ട്രംപ് പറഞ്ഞു.
തിങ്കളാഴ്ച രാവിലെ സി.എന്.എന്നിന് നല്കിയ ഒമ്പത് മിനിറ്റ് നീണ്ട ഫോണ് അഭിമുഖത്തില്, യു.എസ് സൈന്യം ഇറാനെ വളരെ ശക്തമായി ആക്രമിക്കുന്നുണ്ടെന്ന് യു.എസ് പ്രസിഡന്റ് വെളിപ്പെടുത്തി. എന്നാല് സൈനിക നടപടികളുടെ വലിയ തരംഗം ഇതുവരെ ആരംഭിച്ചിട്ടില്ലെന്ന് ട്രംപ് സൂചിപ്പിച്ചു. ഞങ്ങള് അവരെ വളരെ കഠിനമായി ആക്രമിക്കുന്നു. അത് വളരെ നന്നായി നടക്കുന്നുണ്ടെന്ന് ഞാന് കരുതുന്നു. ഇത് വളരെ ശക്തമായ ഓപ്പറേഷനാണ്. ലോകത്തിലെ ഏറ്റവും വലിയ സൈന്യം നമുക്കുണ്ട്, ഞങ്ങള് അതിനെ ഉപയോഗിക്കുന്നു – ട്രംപ് കൂട്ടിച്ചേര്ത്തു.