വാഷിംഗ്ടണ് – ഇറാൻ പരമോന്നത നേതാവ് അലി ഖാംനഇയെ വധിക്കാൻ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു യുഎസ് പ്രസിഡന്റ് ഡൊണാൾഡ് ട്രംപിനോട് ആവശ്യപ്പെട്ടതായി റോയിട്ടേഴ്സ് റിപ്പോർട്ട് ചെയ്തു. ഇറാനെതിരെ യുഎസ്-ഇസ്രായേൽ സംയുക്ത ആക്രമണം ആരംഭിക്കുന്നതിന് 48 മണിക്കൂർ മുമ്പ് ട്രംപുമായി നടത്തിയ ഫോൺ സംഭാഷണത്തിലാണ് നെതന്യാഹു ഈ ആവശ്യം ഉന്നയിച്ചത്. ഇറാനുമായി ഒരു പൂർണ്ണ യുദ്ധത്തിന് ട്രംപ് നേരത്തെ വിമുഖത കാണിച്ചിരുന്നെങ്കിലും, ഈ ആക്രമണം അനിവാര്യമാക്കുന്ന കാരണങ്ങളെക്കുറിച്ച് നെതന്യാഹു ട്രംപിനോട് വിശദീകരിച്ചു.
യുദ്ധം ആരംഭിച്ച ആഴ്ചയുടെ തുടക്കത്തിൽ തന്നെ ഖാംനഇയും അദ്ദേഹത്തിന്റെ ഉന്നത സഹായികളും തെഹ്റാനിലെ ഔദ്യോഗിക വസതിയിൽ കൂടിക്കാഴ്ച നടത്തുമെന്ന വിവരം ഇന്റലിജൻസ് റിപ്പോർട്ടുകൾ വഴി ട്രംപിനും നെതന്യാഹുവിനും ലഭിച്ചിരുന്നു. എന്നാൽ ശനിയാഴ്ച വൈകുന്നേരം നടക്കാനിരുന്ന ഈ യോഗം പെട്ടെന്ന് ശനിയാഴ്ച രാവിലെയിലേക്ക് മാറ്റിയതായി പുതിയ ഇന്റലിജൻസ് സൂചനകൾ ലഭിച്ചുവെന്ന് ഈ ചർച്ചകളെക്കുറിച്ച് അറിവുള്ള വൃത്തങ്ങൾ വെളിപ്പെടുത്തി.
പതിറ്റാണ്ടുകളായി താൻ ലക്ഷ്യമിട്ടിരുന്ന ഈ നീക്കവുമായി മുന്നോട്ട് പോകാൻ നെതന്യാഹു തീരുമാനിക്കുകയായിരുന്നു. ഖാംനഇയെ വധിക്കാനും, ട്രംപിനെ വധിക്കാൻ ഇറാൻ നേരത്തെ നടത്തിയ ശ്രമങ്ങൾക്ക് പ്രതികാരം ചെയ്യാനും ഇതിലും നല്ലൊരു അവസരം ലഭിക്കില്ലെന്ന് നെതന്യാഹു വാദിച്ചു. 2024-ൽ ട്രംപ് പ്രസിഡന്റ് സ്ഥാനാർത്ഥിയായിരുന്ന സമയത്ത് ഇറാൻ ആസൂത്രണം ചെയ്തതായി പറയപ്പെടുന്ന വധശ്രമ ഗൂഢാലോചനകളെ മുൻനിർത്തിയായിരുന്നു നെതന്യാഹുവിന്റെ ഈ നീക്കം.
ഖുദ്സ് ഫോഴ്സ് കമാൻഡറായിരുന്ന ഖാസിം സുലൈമാനിയെ അമേരിക്ക വധിച്ചതിന് പകരമായി യുഎസിൽ ആളുകളെ റിക്രൂട്ട് ചെയ്ത് കൊലപാതകങ്ങൾക്ക് ശ്രമിച്ചുവെന്നാരോപിച്ച് ഒരു പാകിസ്ഥാൻ പൗരനെതിരെ യുഎസ് നീതിന്യായ വകുപ്പ് നേരത്തെ കുറ്റം ചുമത്തിയിരുന്നു. ഇത്തരം നീക്കങ്ങൾ ഇറാൻ തുടരുന്ന പശ്ചാത്തലത്തിൽ ഖാംനഇയെ വധിക്കുന്നത് ഉചിതമായ തിരിച്ചടിയാകുമെന്ന് നെതന്യാഹു ട്രംപിനെ ബോധ്യപ്പെടുത്താൻ ശ്രമിച്ചതായും റിപ്പോർട്ടുകൾ സൂചിപ്പിക്കുന്നു.