മലപ്പുറം- സി.പി.എം സംസ്ഥാന സെക്രട്ടേറിയറ്റിന്റെ പ്രസ്താവനക്ക് പിന്നാലെ, ഇന്ന് വൈകിട്ട് അഞ്ചിന് വീണ്ടും മാധ്യമങ്ങളെ കാണുമെന്ന് പി.വി അൻവർ എം.എൽ.എ. വിശ്വാസങ്ങൾക്കും, വിധേയത്വത്തിനും,താൽക്കാലികതയ്ക്കും അപ്പുറം ഓരോ മനുഷ്യനിലുമുള്ള ആത്മാഭിമാനം തന്നിൽ
ഇത്തിരി കൂടുതലുണ്ടെന്നും നീതിയില്ലെങ്കിൽ നീ തീയാവുക എന്ന വാക്കിന്റെ ബലത്തിൽ ഇന്ന് വൈകിട്ട് അഞ്ച് മണിക്ക് മാധ്യമങ്ങളെ കാണുന്നുണ്ടെന്നും അൻവർ ഫെയ്സ്ബുക്കിൽ കുറിച്ചു.
പാർട്ടിയിൽ അംഗമല്ലെങ്കിലും പാർലമെന്ററി പാർട്ടി അംഗമായ അൻവർ അച്ചടക്കത്തിന്റെ പരിധിയിൽ വരുമെന്നും പാർട്ടി മുന്നറിയിപ്പ് നൽകിയിരുന്നു. തിരുത്തിയില്ലെങ്കിൽ പുറത്താക്കുന്നത് അടക്കമുള്ള നടപടികളിലേക്കും സി.പി.എം കടന്നേക്കുമെന്ന വാർത്തകൾക്കിടെയാണ് അൻവർ ഇന്ന് വീണ്ടും മാധ്യമങ്ങളെ കാണുന്നത്. പരസ്യപ്രസ്താവന ഇനി നടത്തില്ലെന്ന് കഴിഞ്ഞ ദിവസം അൻവർ പറഞ്ഞിരുന്നു. കഴിഞ്ഞ ദിവസം നടത്തിയ പത്രസമ്മേളനത്തിൽ മുഖ്യമന്ത്രിക്ക് എതിരെ അൻവർ പരോക്ഷ വിമർശനം നടത്തിയിരുന്നു. ചിലർക്ക് കാര്യങ്ങൾ മനസിലാകാൻ കുറച്ചു സമയം എടുക്കും എന്നായിരുന്നു അൻവറിന്റെ പ്രസ്താവന.