മലപ്പുറം– ഇസ്രായില്-ഇറാന് യുദ്ധ പശ്ചാത്തലത്തില് ഇറാന്റെ മികച്ച പ്രതിരോധത്തോടെ മിഡില് ഈസ്റ്റിലെ അനിയന്ത്രിത പാശ്ചാത്യ നിയന്ത്രണത്തിന്റെ യുഗം മങ്ങിയിരിക്കുന്നു എന്ന സത്യമാണ് ഇപ്പോള് വ്യക്തമായിരിക്കുന്നതെന്ന് ചൂണ്ടിക്കാട്ടിയുള്ള സമൂഹ മാധ്യമ പോസ്റ്റുമായി യൂത്ത് ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവ്വറലി ശിഹാബ് തങ്ങള്. പശ്ചിമേഷ്യയില് പുതിയ സന്തുലിതാവസ്ഥയുടെ പ്രഖ്യാപനമെന്നും അദ്ദേഹം എടുത്തുപറയുന്നു. ‘മാഗ’ (MAGA, Make America Great Again) അടിത്തറക്കുള്ളില് പോലും ഇസ്രായിലിനുള്ള അന്ധമായ പിന്തുണയില് വിള്ളല് വീണത് വ്യക്തമാക്കുന്ന ഫെയിസ്ബുക് പോസ്റ്റ് പശ്ചിമേഷ്യയിലും ലോകമാകേയും സമാധാനത്തിന്റെ സന്ദേശമുയര്ത്തിപ്പിടിക്കാന് ആഹ്വാനം ചെയ്താണ് അവസാനിപ്പിക്കുന്നത്.
പോസ്റ്റിന്റെ പൂര്ണ്ണരൂപം: ”ഇറാനെതിരെ ഇസ്രായേല് സൈനിക ആധിപത്യം വ്യക്തമായിരുന്നു. എന്നാല് യുദ്ധത്തിന്റെ യഥാര്ത്ഥ പ്രതിഫലനം ആഗോള മയമായിരുന്നു. ഇറാന് വീണില്ല; എന്ന് മാത്രമല്ല, കൂടുതല് ശക്തമായി, കൂടുതല് ദൃഢനിശ്ചയത്തോടെ ഉയര്ന്നു നിന്നു. ഇത് പശ്ചിമേഷ്യയില് ഒരു പുതിയ സന്തുലിതാവസ്ഥയുടെ പ്രഖ്യാപനം കൂടിയാണ്. അജന്ഡകള് മുന്കൂട്ടി സെറ്റ് ചെയ്ത പതിവ് പാശ്ചാത്യ മാധ്യമ വിവരണങ്ങള് പരാജയപ്പെട്ടു. ജനങ്ങള് സത്യം സ്വയം കണ്ടു. ‘മാഗ’ അടിത്തറയ്ക്കുള്ളില് പോലും, ഇസ്രായിലിനുള്ള അന്ധമായ പിന്തുണയില് വിള്ളലുകള് പ്രത്യക്ഷപ്പെട്ടു. ഇറാന് ഒറ്റയ്ക്കല്ല. ജനങ്ങളുടെ ശക്തിയിലും, നിശബ്ദമെങ്കിലും അനുകൂലമായ ആഗോള പിന്തുണയിലും അത് ഉറച്ചുനിന്നു, ആയത്തുള്ള അലി ഖാംനഈ എന്ന യോദ്ധാവിന്റെ അചഞ്ചലമായ നേതൃത്വത്തിന് പിന്നില് നിശ്ചയദാര്ഢ്യത്തോടെ. ഇസ്രായേല്, മേഖലയെ തെറ്റായി വായിച്ചു അസ്ഥിരപ്പെടുത്താന് ഇറങ്ങിയതായിരുന്നു. എന്നാല് ഇത് വെറുമൊരു വണ്സൈഡഡ് യുദ്ധം ആയിരുന്നില്ല.
മറിച്ച് പാശ്ചാത്യ സയണിസ്റ്റ് ആഖ്യാനത്തിന്റെ തകര്ച്ചയിലേക്കും, പശ്ചിമ തീരത്തിന്റെ നീതിപൂര്വ്വമായ പുനഃക്രമീകരണത്തിലേക്കും വികസിക്കുന്ന സംഭവഗതികളായി വിലയിരുത്തപ്പെടുന്നു. ഫലസ്തീനിലെ നിസ്സഹായരായ മനുഷ്യര്ക്ക് മേലുള്ള ജിനോസൈഡ് (വംശഹത്യ) പോലെ, ഇറാഖിലെയും അഫ്ഗാനിലെയും സിറിയയിലെയും ലബനോനിലെയും പോലെ പ്രയാസരഹിതമായ ഒരു യുദ്ധം സ്വപ്നം കണ്ടവര്ക്ക് ഇറാനില് ചുവടുകള് പിഴച്ചിരിക്കുന്നു. ഒരു പരമാധികാര രാജ്യത്തെ ഏകപക്ഷീയമായി ആക്രമിച്ചവര്ക്ക്,
മിഡില് ഈസ്റ്റിനുമേലുള്ള അനിയന്ത്രിതമായ പാശ്ചാത്യ നിയന്ത്രണത്തിന്റെ യുഗം മങ്ങിയിരിക്കുന്നു എന്ന സത്യമാണ് ഇപ്പോള് വ്യക്തമായിരിക്കുന്നത്. പശ്ചിമേഷ്യയിലും ലോകമാകെയും സമാധാനത്തിന്റെ പുലരികള് സാധ്യമാവട്ടെ.
ഇനിയൊരു യുദ്ധവും ആര്ക്കുമേലും അടിച്ചേല്പിക്കപ്പെടാതിരിക്കട്ടെ..”