പൊന്നാനി– നാട്ടില്‍തിരിച്ചെത്തിയ പ്രവാസികൾക്കായി (വാര്‍ഷിക വരുമാനം ഒന്നരലക്ഷം രൂപയില്‍ താഴെ) നോര്‍ക്ക റൂട്ട്സ് സാന്ത്വന അദാലത്ത് സംഘടിപ്പിച്ചു.
സംസ്ഥാന സര്‍ക്കാര്‍ നോര്‍ക്ക റൂട്ട്സ് വഴി നടപ്പിലാക്കിവരുന്ന സാന്ത്വന ധനസഹായപദ്ധതിയുടെ ഭാഗമായുളള അദാലത്താണ് മലപ്പുറം പൊന്നാനിയില്‍ സംഘടിപ്പിച്ചത്. 100 ഓളം പ്രവാസികളാണ് അദാലത്തില്‍ പങ്കെടുത്തത്. പൊന്നാനി മുന്‍സിപ്പല്‍ കോണ്‍ഫറന്‍സ് ഹാളില്‍ രാവിലെ 10 മുതല്‍ വൈകിട്ട് മൂന്നു മണി വരെയാണ് പരിപാടി നടന്നത്. ഇവരില്‍ 90 ല്‍ അധികം അപേക്ഷകളും തുടര്‍ നടപടിക്രമങ്ങള്‍ക്കായി വിട്ടു. മരണാനന്തര ധനസഹായമായി ആശ്രിതര്‍ക്ക് പരമാവധി ഒരു ലക്ഷം രൂപ വരെയും, ചികിത്സാ സഹായമായി പരമാവധി 50,000 രൂപയും, മകളുടെ വിവാഹത്തിന് പരമാവധി 15,000 രൂപയും കൃത്രിമ കാൽ, ഊന്നുവടി, വീൽചെയർ പോലുള്ള അംഗപരിമിത പരിഹാര ഉപകരണങ്ങള്‍ക്ക് പരമാവധി 10,000 രൂപയും സാന്ത്വന പദ്ധതി പ്രകാരം പ്രവാസികേരളീയര്‍ക്ക് ലഭിക്കുന്നുണ്ട്.
അര്‍ഹരായ പ്രവാസികള്‍ക്ക് www.norkaroots.kerala.gov.in എന്ന വെബ്ബ്സൈറ്റ് സന്ദര്‍ശിച്ച് പദ്ധതിയിലേയ്ക്ക് അപേക്ഷ നല്‍കാവുന്നതാണ്. പദ്ധതി സംബന്ധിക്കുന്ന കൂടുതല്‍ വിവരങ്ങള്‍ക്ക് 24 മണിക്കൂറും പ്രവര്‍ത്തിക്കുന്ന നോര്‍ക്ക ഗ്ലോബല്‍ കോണ്‍ടാക്ട് സെന്ററിന്റെ ടോള്‍ ഫ്രീ നമ്പറുകളായ 1800 425 3939 (ഇന്ത്യയില്‍ നിന്നും) +91-8802 012 345 (വിദേശത്തുനിന്നും, മിസ്സ്ഡ് കോള്‍ സര്‍വ്വീസ്) ബന്ധപ്പെടാവുന്നതാണ്.
നോര്‍ക്ക റൂട്ട്സ് കോഴിക്കോട് സെന്റര്‍ മാനേജര്‍ സി.രവീന്ദ്രന്‍ അദാലത്തിന് നേതൃത്വം നല്‍കി. നോര്‍ക്ക റൂട്ട്സില്‍ നിന്നും പ്രദീഷ് എം.പി, ഷര്‍മ്മിള. കെ, സുഭീഷ, വി.പി, ജീജ. കെ, ബീനാകുമാരി. എസ് എന്നിവരും പങ്കെടുത്തു.