തിരുവനന്തപുരം: കേരളാ ക്രിക്കറ്റ് ലീഗിലെ സീസണിലെ ആദ്യ മല്സരത്തില് ആലപ്പി റിപ്പിള്സിന് ജയം. തൃശ്ശൂര് ടൈറ്റന്സിനെതിരേ അഞ്ചുവിക്കറ്റിന്റെ ജയമാണ് ആലപ്പി റിപ്പിള്സ് നേടിയത്. തൃശ്ശൂര് ടൈറ്റന്സ് ഉയര്ത്തിയ 162 റണ്സ് ലക്ഷ്യം 18.3 ഓവറില് ആലപ്പി പിന്തുടര്ന്നു. അഞ്ച് വിക്കറ്റ് നഷ്ടത്തിലാണ് ആലപ്പി സ്കോര് പിന്തുടര്ന്നത്. ക്യാപ്റ്റന് മുഹമ്മദ് അസ്ഹറുദ്ദീന്റെ തകര്പ്പന് ഇന്നിങ്സാണ് ആലപ്പിക്ക് ജയമൊരുക്കിയത്. 47 പന്തില് താരം 92 റണ്സെടുത്തു. സെഞ്ചുറിക്ക് എട്ടു റണ്സ് അകലെയാണ് അസ്ഹറുദ്ദീന് പുറത്തായത്.
ആലപ്പിക്ക് വേണ്ടി വിനൂപ് മനോഹരന് 30ഉം അക്ഷയ് ടികെ 18ഉം ആല്ഫി ഫ്രാന്സിസ് 12 ഉം റണ്സെടുത്തു.നീല് സണ്ണിയും കൃഷ്ണപ്രസാദും ഓരോ റണ്സ് വീതമെടുത്തു.തൃശ്ശൂരിനായി എംഡി നീതിഷ് രണ്ട് വിക്കറ്റ് നേടി.
ടോസ് ലഭിച്ച ആലപ്പി തൃശ്ശൂരിനെ ബാറ്റിങിനയക്കുകയായിരുന്നു. നിശ്ചിത ഓവറില് എട്ട് വിക്കറ്റ് നഷ്ടത്തിലാണ് തൃശ്ശൂര് ടൈറ്റന്സ് 161 റണ്സെടുത്തത്. തൃശ്ശൂര് നിരയില് അക്ഷയ് മനോഹര് 44 പന്തില് 57 റണ്സെടുത്ത് ടോപ് സ്കോറര് ആയി. വിഷ്ണു വിനോദ് 14 പന്തില് 22ഉം ഇമ്രാന് അഹ്മദ് 21 പന്തില് 23ഉം ക്യാപ്റ്റന് അര്ജുന് 20 പന്തില് 20 റണ്സും നേടി.
അനസ് നസീര് 12 റണ്സെടുത്തു.കൃഷ്ണന് മിഥുന് 12 റണ്സെടുത്ത് പുറത്താവാതെ നിന്നു. ആലപ്പിയ്ക്കായി ആനന്ദ് ജോസഫ് മൂന്നും ഫാസില് ഫാനൂസ് രണ്ടും വിക്കറ്റ് നേടി.