ജിദ്ദ എയര്‍പോര്‍ട്ടില്‍ യാത്രക്കാരുടെ എണ്ണത്തില്‍ സര്‍വകാല റെക്കോര്‍ഡ്
ജിദ്ദ – ജിദ്ദ കിംഗ് അബ്ദുല്‍ അസീസ് ഇന്റര്‍നാഷണല്‍ എയര്‍പോര്‍ട്ടില്‍ യാത്രക്കാരുടെ എണ്ണത്തില്‍ പുതിയ റെക്കോര്‍ഡ്. ഒരു ദിവസത്തിനിടെ വിമാനത്താവളത്തിലൂടെ കടന്നുപോയത് 1,61,189 യാത്രക്കാര്‍. നവംബര്‍ ആറിന് ബുധനാഴ്ചയാണ് ഈ റെക്കോര്‍ഡ് രേഖപ്പെടുത്തിയതെന്ന് ജിദ്ദ എയര്‍പോര്‍ട്ട്‌സ് കമ്പനി അറിയിച്ചു. ആകെ യാത്രക്കാരില്‍ 79,994 പേര്‍ ആഗമന സര്‍വീസുകളില്‍ ജിദ്ദ എയര്‍പോര്‍ട്ടിലെത്തുകയും 81,195 പേര്‍ നിര്‍ഗമന സര്‍വീസുകളില്‍ ജിദ്ദ വിമാനത്താവളത്തില്‍ നിന്ന് യാത്ര തിരിക്കുകയും ചെയ്തു.
നവംബര്‍ ആറിന് ജിദ്ദ എയര്‍പോര്‍ട്ടില്‍ ആകെ 817 വിമാന സര്‍വീസുകളാണ് നടന്നത്. മണിക്കൂറില്‍ ശരാശരി 34 സര്‍വീസുകള്‍ വീതം അന്ന് ജിദ്ദ വിമാനത്താവളത്തില്‍ നടന്നു. അന്നേദിവസം ആകെ 1,32,189 ബാഗേജുകള്‍ ജിദ്ദ എയര്‍പോര്‍ട്ടില്‍ കൈകാര്യം ചെയ്തു.
ഈ റെക്കോര്‍ഡ് കൈവരിക്കുന്നതില്‍ പങ്കാളികളായ സര്‍ക്കാര്‍, സുരക്ഷാ വകുപ്പുകള്‍ക്കും എയര്‍പോര്‍ട്ടിലെ വിവിധ വിഭാഗങ്ങള്‍ക്കും ജിദ്ദ എയര്‍പോര്‍ട്ട്‌സ് കമ്പനി സി.ഇ.ഒ എന്‍ജിനീയര്‍ മാസിന്‍ ജൗഹര്‍ നന്ദി പറഞ്ഞു. എല്ലാവരും ഒത്തൊരുമയോടെയും സഹകരണത്തോടെയും പ്രവര്‍ത്തിച്ചതിന്റെ ഫലമായാണ് ഈ നേട്ടം കൈവരിക്കാന്‍ സാധിച്ചത്.