ഗാസ – തെക്കന്‍ ഗാസ മുനമ്പിലെ തുരങ്ക ശൃംഖല തകര്‍ക്കുന്നതിനിടെ അടുത്തിടെ കൊല്ലപ്പെട്ട ഒമ്പത് ഫലസ്തീന്‍ പോരാളികളുടെ മൃതദേഹങ്ങള്‍ കണ്ടെത്തിയതായി ഇസ്രായില്‍ സൈന്യം അറിയിച്ചു. റഫയുടെ കിഴക്കന്‍ പ്രദേശത്ത് നടത്തിയ ഓപ്പറേഷനുകളില്‍ സൈനികര്‍ ഭൂഗര്‍ഭ തുരങ്കങ്ങള്‍ക്കുള്ളില്‍ ഇല്ലാതാക്കിയ ഒമ്പത് ഭീകരരുടെ മൃതദേഹങ്ങള്‍ കൂടി കണ്ടെത്തിയതായി ഇസ്രായില്‍ സൈന്യം പ്രസ്താവനയില്‍ പറഞ്ഞു. റഫ പ്രദേശത്ത് തുരങ്കങ്ങളിലൂടെ രക്ഷപ്പെടാന്‍ ശ്രമിച്ച 30 ലേറെ പോരാളികളെ സൈന്യം ഇതിനകം കൊലപ്പെടുത്തിയതായും പ്രസ്താവന കൂട്ടിച്ചേര്‍ത്തു.
ഗാസ മുനമ്പില്‍ ഇസ്രായില്‍ നിയന്ത്രണത്തിലുള്ള പ്രദേശത്തിന് കീഴിലുള്ള തുരങ്കങ്ങള്‍ക്കുള്ളില്‍ ആഴ്ചകളായി കുടുങ്ങിക്കിടക്കുന്ന ഡസന്‍ കണക്കിന് ഹമാസ് പോരാളികളുടെ വിധിയെ കുറിച്ച് ചര്‍ച്ചകള്‍ നടക്കുന്നുണ്ട്. ബുധനാഴ്ചയാണ് ഹമാസ് ആദ്യമായി ഈ വസ്തുതകള്‍ അംഗീകരിച്ചത്. തങ്ങളുടെ പോരാളികളെ തുരങ്കങ്ങളില്‍ നിന്ന് സുരക്ഷിതമായി പുറത്തുകടക്കാന്‍ അനുവദിക്കുന്നതിന് ഇസ്രായിലിനു മേല്‍ സമ്മര്‍ദം ചെലുത്താന്‍ മധ്യസ്ഥത വഹിക്കുന്ന രാജ്യങ്ങളോട് ഹമാസ് ആവശ്യപ്പെട്ടു. അമേരിക്ക മധ്യസ്ഥത വഹിച്ച് ഒക്ടോബര്‍ 10 മുതല്‍ പ്രാബല്യത്തില്‍ വന്ന വെടിനിര്‍ത്തല്‍ കരാര്‍ പ്രകാരം ഇസ്രായില്‍ സൈന്യം ഗാസ മുനമ്പില്‍ യെല്ലോ ലൈന്‍ എന്ന് വിളിക്കപ്പെടുന്ന പ്രദേശത്തിനപ്പുറത്ത് വീണ്ടും നിലയുറപ്പിച്ചു. ഗാസയുടെ 50 ശതമാനത്തിലധികം പ്രദേശത്തിന്റെ നിയന്ത്രണം ഇത് അവര്‍ക്ക് നല്‍കുന്നു. റഫക്ക് സമീപമുള്ള യെല്ലോ ലൈനിന് അപ്പുറത്തുള്ള തുരങ്കങ്ങളില്‍ നിന്ന് ഹമാസ് പോരാളികളെ പുറത്തുവരാന്‍ അനുവദിക്കുന്ന ഒത്തുതീര്‍പ്പ് രൂപപ്പെടുത്താന്‍ അമേരിക്ക, ഖത്തര്‍, ഈജിപ്ത്, തുര്‍ക്കി എന്നീ രാജ്യങ്ങള്‍ പ്രവര്‍ത്തിക്കുന്നതായി മധ്യസ്ഥത വഹിക്കുന്ന രാജ്യങ്ങളിലൊന്നില്‍ നിന്നുള്ള വൃത്തങ്ങള്‍ വെളിപ്പെടുത്തി. ഈ പ്രശ്‌നം കൂടുതല്‍ വെടിനിര്‍ത്തല്‍ ലംഘനങ്ങളിലേക്കോ അതിന്റെ തകര്‍ച്ചയിലേക്കോ നയിച്ചേക്കാവുന്ന സംഘര്‍ഷത്തിന്റെ കേന്ദ്രബിന്ദുവായി മാറുന്നില്ലെന്ന് ഉറപ്പാക്കാന്‍ നിലവിലെ നിര്‍ദേശം ഇസ്രായിലിന്റെ നിയന്ത്രണത്തിലല്ലാത്ത പ്രദേശങ്ങളിലേക്ക് അവര്‍ക്ക് സുരക്ഷിതമായ പാത വാഗ്ദാനം ചെയ്യുന്നതായി ബന്ധപ്പെട്ട വൃത്തങ്ങള്‍ പറഞ്ഞു.
60 നും 80 നും ഇടയില്‍ പോരാളികള്‍ റഫയില്‍ ഭൂഗര്‍ഭ തുരങ്കങ്ങളില്‍ കുടുങ്ങിക്കിടക്കുകയാണെന്ന് ഗാസയിലെ ഹമാസ് ഉദ്യോഗസ്ഥന്‍ പറഞ്ഞു. ഇവര്‍ക്ക് സുരക്ഷിതമായ പാത നല്‍കാന്‍ ഇസ്രായില്‍ പ്രധാനമന്ത്രി ബെഞ്ചമിന്‍ നെതന്യാഹു തയ്യാറല്ലെന്ന് നവംബര്‍ ആദ്യം നെതന്യാഹുവിന്റെ വക്താവ് പറഞ്ഞു.