ഒമാനിൽ മലപ്പുറം സ്വദേശിയായ ഡോക്ടർ ഒഴുക്കിൽപ്പെട്ട് മരിച്ചു

മസ്കത്ത്- അരുവിയിൽ കുളിച്ചുകൊണ്ടിരിക്കെ ഒഴുക്കിൽപ്പെട്ട് മലപ്പുറം സ്വദേശിയായ ഡോക്ടർ ഒമാനിൽ മരിച്ചു. നിസ്വ ഹോസ്പിറ്റലിലെ മലയാളി ഡോക്ടർ കോക്കൂർ സ്വദേശി വട്ടത്തൂർ വളപ്പിൽ വീട്ടിൽ ഡോക്ടർ നവാഫ് ഇബ്രാഹിം (34) ആണ് മരിച്ചത്. ഒമാനിലെ ഇബ്രിക്ക് അടുത്ത് വാദി ധാം എന്ന സ്ഥലത്ത് ഒഴുക്കിൽപ്പെട്ടാണ് മരണം സംഭവിച്ചത്. ഒമാനിലെ ഇബ്രിയിൽനിന്ന് 60 കിലോമീറ്റർ അകലെ വാദി ധാം എന്ന സ്ഥലത്ത് ബുധനാഴ്‌ച വൈകീട്ടായിരുന്നു അപകടം. ഭാര്യ ഡോ: നിഷിയയും മകൻ നഹാനുമൊത്ത് വാദി ഡാം സന്ദർശിക്കാനെത്തിയതായിരുന്നു.

മകൻ നഹാനുമൊത്ത് വാദിയിൽ കുളിച്ച് കൊണ്ടിരിക്കെ കാൽ വഴുതി വീഴുകയായിരുന്നു. പാറയിൽ കുടുങ്ങിയ ഇദ്ദേഹത്തെ സമീപത്തുണ്ടായിരുന്ന മറ്റു ടൂറിസ്റ്റുകൾ എത്തിയാണ് പുറത്തെടുത്തത്. ഉടനെ സി.പി.ആർ നൽകിയെങ്കിലും രക്ഷിക്കാനായില്ല. മൃതദേഹം ഇബ്രി ആശുപത്രി മോർച്ചറിയിലേക്ക് മാറ്റി.