റിയാദ്: സൂപ്പര്‍ താരം ക്രിസ്റ്റ്യാനോ റൊണാള്‍ഡോ അല്‍ നസറിനായി ലീഡെടുത്തിട്ട് ആദ്യ മല്‍സരത്തില്‍ സമനില പൂട്ട്. സൗദി പ്രോ ലീഗിലെ സീസണിലെ ആദ്യ മല്‍സരത്തില്‍ അല്‍ നസര്‍ അല്‍ റെയ്ദിനോടാണ് സമനില വഴങ്ങിയത്. 1-1നാണ് മല്‍സരം അവസാനിച്ചത്. മല്‍സരത്തില്‍ റൊണാള്‍ഡോയിലൂടെ അല്‍ നസറാണ് ലീഡെടുത്തത്. 34ാം മിനിറ്റിലാണ് താരത്തിന്റെ ഗോള്‍. 49ാം മിനിറ്റില്‍ പെനാല്‍റ്റിയിലൂടെയാണ് അല്‍ റെയ്ദ് സമനില പിടിച്ചത്. മുഹമ്മദ് ഫൗസെയര്‍ ആണ് അല്‍ റെയ്ദിന്റെ സ്‌കോറര്‍. രണ്ടാം പകുതിയില്‍ റൊണാള്‍ഡോ വീണ്ടും സ്‌കോര്‍ ചെയ്‌തെങ്കിലും അത് ഓഫ്‌സൈഡ് വിളിക്കുകയായിരുന്നു.
ഗോള്‍ നേട്ടത്തോടെ സൗദി പ്രോ ലീഗില്‍ 50ഗോളെന്ന നേട്ടം പോര്‍ച്ചുഗല്‍ താരം സ്വന്തമാക്കി. ലീഗില്‍ അതിവേഗം 50 ഗോള്‍ നേടുന്ന മൂന്നാമത്തെ താരമാണ് ക്രിസ്റ്റിയാനോ. ഒമര്‍ അല്‍ സോമാ, അബ്ദ്ദര്‍ റസാക്ക് ഹംദാല്‍ഹ് എന്നിവരാണ് അതിവേഗം ലീഗില്‍ 50 ഗോള്‍ സ്‌കോര്‍ ചെയ്ത താരങ്ങള്‍.
റൊണാള്‍ഡോയുടെ കരിയര്‍ ഗോളുകളുടെ എണ്ണം 897 ആയി. ലീഗിലെ ആദ്യ മല്‍സരത്തില്‍ അല്‍ ഫെയ്ഹാ അല്‍ താവൂനോട് പരാജയപ്പെട്ടു. എതിരില്ലാത്ത ഒരു ഗോളിനായിരുന്നു അല്‍ താവൂന്റെ ജയം. ഇന്ന് നടക്കുന്ന മല്‍സരങ്ങളില്‍ അല്‍ ഡാമെക്ക് അല്‍ ഖലീജിനെയും അല്‍ അഹ്ലി അല്‍ ഒറോബയെയും നേരിടും. മറ്റൊരു മല്‍സരത്തില്‍ അല്‍ ഖാദിസിയ അല്‍ ഫത്തഹിനെയും നേരിടും.