കൊച്ചി: നടന്‍ സിദ്ദിഖിന്റെ മകന്‍ റാഷിന്‍ സിദ്ദിഖി(37)ന്റെ നിര്യാണത്തിൽ അനുശോചിച്ച് സമൂഹമാധ്യമത്തിൽ പോസ്റ്റ് പങ്കുവെച്ച് നടൻ മമ്മൂട്ടി. സാപ്പീ മോനെ, ഇപ്പോഴും കണ്ണിലിരിക്കുന്നെടാ എന്ന ഒറ്റവരിയിലൂടെയാണ് തന്റെ ദുഖം മമ്മൂട്ടി ഫെയ്സ്ബുക്കിൽ പങ്കുവെച്ചത്.
ഇന്ന് പുലര്‍ച്ചെ കൊച്ചിയിലെ സ്വകാര്യ ആശുപത്രിയിലായിരുന്നു റാഷിൻ സിദ്ദീഖിന്റെ അന്ത്യം. സാപ്പി എന്ന് വിളിപ്പേരുള്ള റാഷിന്റെ പിറന്നാള്‍ ആഘോഷത്തില്‍ നിന്നുള്ള ചിത്രങ്ങളും വിഡിയോകളുമെല്ലാം സിദ്ദിഖും ഷഹീന്‍ സിദ്ദിഖും സമൂഹമാധ്യമങ്ങളിലൂടെ പങ്കുവെക്കാറുണ്ടായിരുന്നു.
പടമുകള്‍ പള്ളിയില്‍ നാല് മണിക്ക് റാഷിൻ സിദ്ദീഖിന്റെ ഖബറടക്കം നടന്നു. നടന്‍ ഷഹീന്‍ സിദ്ദിഖ്, ഫര്‍ഹീന്‍ സിദ്ദിഖ് എന്നിവര്‍ സഹോദരങ്ങളാണ്.
മാനസിക വെല്ലുവിളി നേരിടുന്ന സാപ്പിയെ സ്പെഷ്യൽ ചൈൽഡ് എന്നാണ് സിദ്ദീഖ് വിശേഷിപ്പിച്ചിരുന്നു. കുടുംബത്തിലെ എല്ലാ ചടങ്ങുകളിലും നിറ സാന്നിധ്യമായിരുന്നു സാപ്പി. സിദ്ദീഖിന്റെ വീട്ടിൽ ആരു വന്നാലും ആദ്യം ഓടിയെത്തുന്നതും സാപ്പിയായിരുന്നു. കഴിഞ്ഞ നവംബർ 26-ന് സാപ്പിയുടെ പിറന്നാൾ ആഘോഷത്തിലെ ചിത്രങ്ങൾ സിദ്ദീഖ് പങ്കുവെച്ചിരുന്നു.
സിനിമാ മേഖലയിലെ നിരവധി പേർ സിദ്ദീഖിനെ ആശ്വസിപ്പിക്കാനെത്തി. ദിലീപ്, കാവ്യമാധവൻ, റഹ്മാൻ, ഫഹദ് ഫാസിൽ, നാദിർഷ, ബാബുരാജ്, ജോമോൾ, ബേസിൽ ജോസഫ്, രജിഷ വിജയൻ, ഗ്രേസ് ആന്റണി, രഞ്ജി പണിക്കർ, ഷാഫി, ജയൻ ചേർത്തല, ഇടവേള ബാബു, ബാബുരാജ് തുടങ്ങിയ നിരവധി പേർ എത്തിയിരുന്നു.