നിലമ്പൂർ- യൂത്ത് കോൺഗ്രസ് നേതാവും പാലക്കാട് എം.എൽ.എയുമായ രാഹുൽ മാങ്കൂട്ടത്തിൽ നിലമ്പൂരിലെ മുൻ എം.എൽ.എയും തൃണമൂൽ കോൺഗ്രസ് നേതാവുമായ പി.വി അൻവറിന്റെ വീട്ടിൽ രാത്രി സന്ദർശനം നടത്തുന്നതിന്റെ വീഡിയോ പുറത്തുവന്നു. ശനിയാഴ്ച രാത്രിയാണ് അൻവറിന്റെ ഒതായിയിലുള്ള വീട്ടിൽ രാഹുലും സംഘവും സന്ദർശനം നടത്തിയത്. രാഹുലും കൂട്ടരും അൻവറിന്റെവീട്ടിലേക്ക് വരുന്നതിന്റെയും പുറത്തേക്ക് പോകുന്നതിന്റെയും വീഡിയോ ആണ് പുറത്തുവന്നത്. അപ്പോ ഗുഡ്നൈറ്റ് എന്നു പറഞ്ഞ് അൻവറിന് കൈ കൊടുത്താണ് രാഹുൽ മടങ്ങുന്നത്. ഓൾ ദ ബെസ്റ്റ് എന്ന് അൻവർ പറയുന്നതും വീഡിയോയിൽ കേൾക്കാം.
അൻവറിന്റെ വീട്ടിൽ രാത്രി തലയിൽ മുണ്ടിട്ട് രാഹുൽ മാങ്കൂട്ടത്തിൽ എത്തി എന്ന അടിക്കുറിപ്പോടെ ഈ വീഡിയോ സോഷ്യൽ മീഡിയയിൽ വൈറലായി. നിലമ്പൂർ തെരഞ്ഞെടുപ്പ് ചൂടിലേക്ക് മാറിയതോടെ രാഹുല് മാങ്കൂട്ടത്തിൽ അടക്കമുള്ള നിരവധി നേതാക്കൾ നിലമ്പൂരിൽ ക്യാമ്പ് ചെയ്ത് തെരഞ്ഞെടുപ്പ് പ്രചാരണത്തിന് നേതൃത്വം നൽകുകയാണ്. ഇടതുമുന്നണിയിൽനിന്ന് ഇടഞ്ഞ് എം.എൽ.എ സ്ഥാനം രാജിവെച്ച പി.വി അൻവർ യു.ഡി.എഫിന് പിന്തുണ നൽകുമെന്ന് അറിയിച്ചിരുന്നെങ്കിലും ഇക്കാര്യത്തിൽ ഇനിയും അന്തിമ തീരുമാനം ആയിട്ടില്ല. നിലവിൽ അൻവറും യു.ഡി.എഫ് നേതൃത്വവും ഇടഞ്ഞുനിൽക്കുകയാണ്. മുന്നണി പ്രവേശനവും തനിക്ക് ഷുവർ സീറ്റും എന്ന ആവശ്യമാണ് അൻവർ ഉന്നയിക്കുന്നത്. എന്നാൽ ഇത് അംഗീകരിക്കാൻ കോൺഗ്രസ് തയ്യാറായിട്ടില്ല.
അതേസമയം, നിലമ്പൂരിൽ ഇടതുമുന്നണിക്ക് വേണ്ടി എം. സ്വരാജ് മത്സരിക്കാനെത്തിയത് ഇടതുക്യാമ്പിൽ ആവേശം പടർത്തിയിട്ടുണ്ട്. സ്വരാജിനെ നിലമ്പൂരിൽ മത്സരിക്കാൻ രാഹുൽ മാങ്കൂട്ടത്തിൽ വെല്ലുവിളിക്കുകയും ചെയ്തിരുന്നു. ഈ സഹചര്യത്തിൽ രാഹൂലിന്റെ ഇന്നത്തെ സന്ദർശനത്ിതനും ഏറെ പ്രസക്തിയുണ്ട്.