നിലമ്പൂര്– നിലമ്പൂര് വഴിക്കടവ് വെള്ളക്കട്ടയില് പത്താം വിദ്യാര്ഥി ഷോക്കേറ്റ് മരിച്ച സംഭവത്തില് രണ്ട് പേര് അറസ്റ്റില്. കാട്ടു പന്നിയുടെ ഇറച്ചിക്ക് വേണ്ടി ഒരുക്കിയ വൈദ്യുതി കമ്പിയില് തട്ടിയാണ് അനന്തു മരണപ്പെട്ടത്. വിനീഷ്, കുഞ്ഞുമുഹമ്മദ് എന്നിവരെയാണ് പോലീസ് കസ്റ്റഡിയിലെടുത്തത്. ഇവര്ക്കെതിരെ മനപൂര്വമല്ലാത്ത നരഹത്യക്ക് പോലീസ് കേസെടുത്തു. ഇരുവരും സ്ഥിരം കുറ്റവാളികളാണെന്നാണ് വിവരം.
സ്വകാര്യ വ്യക്തിയുടെ പറമ്പിലെ കെണിയില് നിന്നാണ് വിദ്യാര്ഥികള്ക്ക് ഷോക്കേറ്റത്. സംഭവം രാഷ്ട്രീയവല്ക്കരിക്കാനുള്ള ശ്രമങ്ങളാണ് നടക്കുന്നതെന്ന് വനം മന്ത്രി എ.കെ ശശീന്ദ്രന് പറഞ്ഞു. തെരഞ്ഞെടുപ്പ് മുന്നില്കണ്ടാണ് ഇത്തരത്തില് സംഭവത്തെ രാഷ്ട്രീയവല്ക്കരിക്കാനുള്ള നീക്കമുണ്ടാക്കുന്നതെന്നും അത് അംഗീകരിക്കാനാകില്ലെന്നും ശശീന്ദ്രന് പറഞ്ഞു. വനം വകുപ്പിന് എന്തെങ്കിലും വീഴ്ച സംഭവിച്ചിട്ടുണ്ടെങ്കില് പരിശോധിക്കുമെന്നും അദ്ദേഹം അറിയിച്ചു.
നിലമ്പൂര് നിയമസഭ ഉപതെരഞ്ഞെടുപ്പ് യു.ഡി.എഫ് സ്ഥാനാര്ഥി ആര്യാടന് ഷൗക്കത്ത് സംഭത്തെ സര്ക്കാര് സപോണ്സേര്ഡ് കൊലപാതകമെന്ന് ആരോപിച്ചു. കെ.എസ്.ഇ.ബിയുടെ അനുവാദത്തോടെയാണ് ഇത്തരം കാര്യങ്ങള് നടക്കുന്നത്. വന്യമൃഗ ശല്യത്തിന്റെ രക്തസാക്ഷി കൂടിയാണ് അനന്തുവെന്നും ഷൗക്കത്ത് പറഞ്ഞു. നിലമ്പൂരിലുണ്ടായ അപകടം നിര്ഭാഗ്യകരമെന്ന് എല്.ഡി.എഫ് സ്ഥാനാര്ഥി എം സ്വരാജ്. രണ്ട് വോട്ടുകള് കൂടുതല് കിട്ടുമെന്ന ധാരണയില് മുതലെടുപ്പ് നടത്തുന്നതും കൊടിയെടുത്ത് ഇറങ്ങുന്നതും ഹീനമായ പ്രവര്ത്തിയാണെന്നും സ്വരാജ് പറഞ്ഞു.