കണ്ണൂർ – വിവാദം കത്തിക്കയറി, പാനൂരിൽ ബോംബ് നിർമ്മാണത്തിനിടെ കൊല്ലപ്പെട്ടവരുടെ ഓർമ്മക്കായി നിർമ്മിച്ച രക്തസാക്ഷി സ്മാരക മന്ദിര ഉദ്ഘാടന ചടങ്ങിൽ നിന്നും സി. പി. എം സംസ്ഥാന സെക്രട്ടറി എം. വി. ഗോവിന്ദൻ വിട്ടു നിന്നു. സ്മാരക മന്ദിരത്തിന്റെ ഉദ്ഘാടനം സി.പി.എം കണ്ണൂർ ജില്ലാ സെക്രട്ടറി എം വി. ജയരാജൻ നിർവഹിച്ചു നൂറു കണക്കിന് പ്രവർത്തകർ ചടങ്ങിൽ പങ്കെടുത്തു.
സി.പി.എം സംസ്ഥാന സെക്രട്ടറി എം വി ഗോവിന്ദൻ ഉദ്ഘാടനം ചെയ്യുമെന്നാണ് നേരത്തെ പ്രഖ്യാപിച്ചിരുന്നത്. എന്നാൽ അദ്ദേഹം പങ്കെടുത്തില്ല. പകരമാണ് എം വി ജയരാജൻ ഉദ്ഘാടനം ചെയ്തത്.
ചെറ്റക്കണ്ടിയിലെ സംഭവത്തെ പാർട്ടി ഒരു കാലത്തും തള്ളിപ്പറഞ്ഞിട്ടില്ലെന്ന് ജയരാജൻ പറഞ്ഞു. സംഭവത്തിൽ സമഗ്രമായ അന്വേഷണം നടത്തണമെന്ന് സിപി.എം അന്ന് ആവശ്യപ്പെട്ടിരുന്നു. എന്നാൽ അന്നത്തെ യു.ഡി.എഫ് സർക്കാർ പല കള്ളക്കേസുകളും എടുത്തുവെന്നും എം വി ജയരാജൻ ആരോപിച്ചു. പാനൂർ ചെറ്റക്കണ്ടിയിൽ ഷൈജു, സുബീഷ് എന്നിവർക്കായാണ് മന്ദിരം പണിതത്. കഴിഞ്ഞ ഒമ്പത് വർഷവും രക്തസാക്ഷി അനുസ്മരണം നടന്നിട്ടുണ്ട്. നാടാകെ സ്നേഹിക്കുന്നവരായിരുന്നു ഷൈജുവും സുബീഷും എന്ന് എം വി ജയരാജൻ പറഞ്ഞു.
എന്നാൽ ഇക്കഴിഞ്ഞ ലോക്സഭാ തിരഞ്ഞെടുപ്പ് സമയത്ത് പാനൂരിൽ ഉണ്ടായ സ്ഫോടനത്തെ സി.പി.എം അംഗീകരിക്കില്ലെന്നും രണ്ടും രണ്ട് സംഭവങ്ങളാണെന്നും അദ്ദേഹം പറഞ്ഞു. തിരഞ്ഞെടുപ്പ് സമയത്ത് ഉണ്ടായ സ്ഫോടനം രണ്ട് സംഘങ്ങൾ തമ്മിലുണ്ടായ കുടിപ്പകയുടെ ഭാഗമാണെന്നും എം വി ജയരാജൻ കൂട്ടിച്ചേർത്തു.