മലപ്പുറം- വിദ്യാഭ്യാസഗവേഷണ രംഗത്തെ അന്താരാഷ്ട്ര സാന്നിധ്യം ശക്തിപ്പെടുത്തി മഅ്ദിന് അക്കാദമിക്ക് വേള്ഡ് ഇസ്ലാമിക് യൂണിവേഴ്സിറ്റീസ് ലീഗില് അംഗത്വം. ഈജിപ്ത് ആസ്ഥാനമായി പ്രവര്ത്തിക്കുന്ന യൂണിവേഴ്സിറ്റീസ് ലീഗില് ലോകത്തെ മുന്നൂറോളം ഇസ്ലാമിക് സര്വ്വകലാശാലകള് അംഗങ്ങളാണ്.
കൈറോയില് നടന്ന അംഗത്വ പ്രഖ്യാപന ചടങ്ങില് മഅ്ദിന് ചെയര്മാന് സയ്യിദ് ഇബ്റാഹീമുല് ഖലീല് അല് ബുഖാരിയും യൂണിവേഴ്സിറ്റീസ് ലീഗ് സെക്രട്ടറി ജനറല് ഡോ. സാമി ശരീഫും ചേര്ന്ന് അന്താരാഷ്ട്ര അക്കാദമിക്ക് സഹകരണ കരാറില് ഒപ്പുവെച്ചു.
സ്ഥാപിതമായി മൂന്ന് പതിറ്റാണ്ടുകള് പിന്നിടുന്ന മഅ്ദിന് അക്കാദമി സയ്യിദ് ഇബ്രാഹിമുല് ഖലീല് ബുഖാരിയുടെ ധൈഷണിക നേതൃത്വത്തിന് കീഴില് വിദ്യാഭ്യാസ, സാംസ്കാരിക, സാമൂഹ്യ സേവന രംഗങ്ങളില് കൈവരിച്ച നേട്ടങ്ങളെ പ്രശംസിച്ച ഡോ. സാമി ശരീഫ്, യൂണിവേഴ്സിറ്റി ലീഗില് മഅ്ദിന് അക്കാദമിയുടെ അംഗത്വം ഇന്തോ-അറബ് വിദ്യാഭ്യാസ സഹകരണ മേഖലകളില് കൂടുതല് വിപ്ലവകരമായ മുന്നേറ്റങ്ങള്ക്ക് വഴിതെളിക്കുമെന്നും പ്രസ്താവിച്ചു.
ചടങ്ങില് ഡോ. വലീദ് അബ്ദുറഹ്മാന്, ഡോ. മുഹമ്മദ് ഖുറഷി, ഡോ. മുഹമ്മദ് ഹദ്ദാദ് എന്നിവര് സന്നിഹിതരായി. ഈജിപ്ത് പ്രസിഡണ്ട് ഡോ അബ്ദുല് ഫത്താഹ് സീസിയുടെ മേല്നോട്ടത്തില് നടന്ന അന്താരാഷ്ട്ര ഇസ്ലാമിക് സമ്മേളന അതിഥിയായി രണ്ടു ദിവസത്തെ ഔദ്യോഗിക സന്ദര്ശത്തിനായി കൈറോയില് എത്തിയതായിരുന്നു ഖലീല് ബുഖാരി തങ്ങള്.