മലപ്പുറം: മലപ്പുറം പോത്തുകല്ലിലെ ആനക്കല്ലിൽ വീണ്ടും ഭൂമിക്കടിയിൽ നിന്ന് ഉഗ്രശബ്ദം. ഇതേതുടർന്ന് പ്രദേശവാസികളെ ഞെട്ടിക്കുളം എ.യു.പി സ്‌കൂളിലേക്ക് മാറ്റി താമസിപ്പിച്ചതായി അധികൃതർ അറിയിച്ചു.
ജനങ്ങളുടെ ആശങ്ക അകറ്റാൻ എത്രയും വേഗം നടപടി സ്വീകരിക്കണമെന്നാവശ്യപ്പെട്ട് പോത്തുകൽ ഗ്രാമപഞ്ചായത്ത് പ്രസിഡന്റിന്റെ നേതൃത്വത്തിൽ പ്രദേശവാസികൾ മലപ്പുറം ജില്ലാ കലക്ടർ ആർ വിനോദിന് നിവേദനം നൽകി.
വിദഗ്ധസംഘത്തെ സ്ഥലത്തെത്തിച്ച് ജനങ്ങളുടെ ആശങ്ക പരിഹരിക്കാൻ സത്വര നടപടികൾ സ്വീകരിക്കുമെന്ന് ജില്ലാ കലക്ടർ പറഞ്ഞു. ഏതാനും ദിവസങ്ങൾക്ക് മുമ്പും പോത്തുകല്ല്, ആനക്കല്ല് ഭാഗങ്ങളിൽ ഭൂമിക്കടിയിൽ നിന്ന് ഉഗ്ര മുഴക്കം അനുഭവപ്പെട്ടിരുന്നു.
സംഭവത്തിൽ രണ്ട് വീടുകൾക്ക് വിള്ളലേറ്റിരുന്നു. തുടർന്ന് വിദഗ്ധന സംഘം സ്ഥലം സന്ദർശിച്ചിരുന്നു. പ്രദേശത്ത് ചെറിയ ഭൂചലന സാധ്യത തള്ളിക്കളയാനാകില്ലെന്ന് അന്ന് കലക്ടർ വ്യക്തമാക്കിയിരുന്നു.