വാഷിംഗ്ടണ് – അമേരിക്കയും ഇറാനും തമ്മിൽ വലിയ തോതിലുള്ള അവിശ്വാസം നിലനിൽക്കുന്നുണ്ടെന്നും ഇത് പെട്ടെന്നൊന്നും പരിഹരിക്കാൻ കഴിയില്ലെന്നും യു.എസ്. വൈസ് പ്രസിഡന്റ് ജെ.ഡി. വാൻസ് പറഞ്ഞു. ടേണിംഗ് പോയിന്റ് യു.എസ്.എ സംഘടിപ്പിച്ച ചടങ്ങിലാണ് അദ്ദേഹം ഇക്കാര്യം വ്യക്തമാക്കിയത്. എന്നാൽ ഇറാൻ ചർച്ചകൾക്ക് തയ്യാറാണെന്നും നിലവിലെ സാഹചര്യത്തിൽ താൻ സംതൃപ്തനാണെന്നും അദ്ദേഹം കൂട്ടിച്ചേർത്തു.
ഇറാനുമായുള്ള യുദ്ധം അവസാനിപ്പിക്കാനുള്ള ചർച്ചകൾ വരും ദിവസങ്ങളിൽ പാകിസ്ഥാനിൽ പുനരാരംഭിക്കുമെന്ന് പ്രസിഡന്റ് ഡൊണാൾഡ് ട്രംപ് അറിയിച്ചിട്ടുണ്ട്. കഴിഞ്ഞ ശനിയാഴ്ച നടന്ന ചർച്ചകളിൽ ജെ.ഡി. വാൻസും പങ്കെടുത്തിരുന്നു. എന്നാൽ ആ ചർച്ചകൾ പരാജയപ്പെട്ടതിനെത്തുടർന്ന് ഇറാന്റെ തുറമുഖങ്ങൾക്ക് മേൽ അമേരിക്ക ഉപരോധം ഏർപ്പെടുത്തി. നിലവിൽ ഇരുരാജ്യങ്ങളും തമ്മിലുള്ള താൽക്കാലിക വെടിനിർത്തൽ ഒരാഴ്ചയ്ക്കുള്ളിൽ അവസാനിക്കാനിരിക്കെയാണ് പുതിയ ചർച്ചകൾ നടക്കുന്നത്.