നിലമ്പൂർ: മുൻ മന്ത്രി ആര്യാടൻ മുഹമ്മദിന്റെ സഹോദരൻ ആര്യാടൻ മമ്മു (71) അന്തരിച്ചു. വാർധക്യസഹജമായ അസുഖങ്ങളെ തുടർന്ന് ചികിത്സയിലായിരുന്ന മമ്മു, ആര്യാടൻ മുഹമ്മദിന്റെ വലംകൈയായി എപ്പോഴും ഒപ്പമുണ്ടായിരുന്നു. ആര്യാടൻ മുഹമ്മദിന്റെ മകൻ ആര്യാടൻ ഷൗക്കത്ത് ഉപതിരഞ്ഞെടുപ്പിൽ വിജയിച്ച ദിനത്തിലാണ് മമ്മുവിന്റെ വിയോഗം.
ഭാര്യ: സൈനബ. മക്കൾ: റേഷ്മ, ജിഷ്മ, റിസ്വാൻ. മരുമക്കൾ: മുജീബ് അത്തിമണ്ണിൽ, സമീർ. മരുമകൾ: ആയിഷ ലുബിന. ആര്യാടൻ മുഹമ്മദിന്റെ വസതിയിൽ ഇന്ന് വൈകിട്ട് 5:30 മുതൽ മൃതദേഹം പൊതുദർശനത്തിന് വയ്ക്കും. കുടുംബാംഗങ്ങൾ ‘ബാപ്പു’ എന്ന് വിളിച്ചിരുന്ന മമ്മുവിന്റെ വിയോഗത്തെക്കുറിച്ച് ആര്യാടൻ ഷൗക്കത്ത് ഫേസ്ബുക്കിൽ കുറിച്ചു:
“പ്രിയപ്പെട്ട ബാപ്പുവും പോയി…
നിലമ്പൂരിന് ഈ മാറ്റത്തിനും, യു.ഡി.എഫിന്റെ വിജയത്തിനും, ഈ അംഗീകാരത്തിനും ഏറ്റവും കൂടുതൽ ആഗ്രഹിച്ച ഞങ്ങളുടെ ബാപ്പു. കുഞ്ഞാക്കന്റെ വേർപാടിനുശേഷം അദ്ദേഹത്തിന്റെ അനുജനായല്ല, കുഞ്ഞാക്കനെപ്പോലെ ഞങ്ങളുടെ കുടുംബത്തിന് തണലായ ബാപ്പു. ആ തണലും മാഞ്ഞു…”
ഇന്ന് രാത്രി 9:30ന് മുക്കട്ട വലിയ ജുമാ മസ്ജിദ് കബറിസ്ഥാനിൽ കബറടക്കം നടക്കും.