കരിപ്പൂര്‍– സാങ്കേതിക തകരാറിനെ തുടര്‍ന്ന് കരിപ്പൂരില്‍ നിന്ന് പറന്നുയര്‍ന്ന വിമാനം തിരിച്ചിറക്കി. ദോഹയിലേക്ക് പുറപ്പെട്ട ഐഎക്‌സ് 375 എയര്‍ ഇന്ത്യ എക്‌സ്പ്രസ് വിമാനമാണ് തിരിച്ചിറക്കിയത്. ഇന്ന് രാവിലെ 11 മണിയോടെയായിരുന്നു സംഭവം. വിമാനത്തിലെ യാത്രക്കാരെല്ലാം സുരക്ഷിതരാണ്. ഏഴ് കുട്ടികളും 175 യാത്രക്കാരുമടക്കം 188 പേരാണ് വിമാനത്തില്‍ ഉണ്ടായിരുന്നത്. രാവിലെ 9.07ന് പുറപ്പെട്ട വിമാനം രണ്ട് മണിക്കൂറിന് ശേഷം വിമാനത്താവളത്തില്‍ തന്നെ തിരിച്ചെത്തിയതായാണ് റിപ്പോര്‍ട്ട്.
വിമാനത്തിന്റെ ക്യാബിന്‍ എസി തകരാറിലായതിനാലാണ് തിരിച്ചിറക്കിയതെന്ന് ഉദ്യോഗസ്ഥര്‍ വ്യക്തമാക്കി. സാങ്കേതിക പിഴവ് കണക്കിലെടുത്ത് മുന്‍കരുതല്‍ നടപടിയായാണ് വിമാനം ലാന്‍ഡിങ് നടത്തിയത്. ഉച്ചക്ക് 1.30 ഓടെ യാത്രക്കാര്‍ക്ക് ബദല്‍ വിമാനം ക്രമീകരിക്കുമെന്നും എയര്‍ ഇന്ത്യ എക്‌സ്പ്രസ് വക്താവ് പറഞ്ഞതായി റിപ്പോര്‍ട്ടുണ്ട്. യാത്രക്കാര്‍ക്ക് ഭക്ഷണം, വെള്ളം തുടങ്ങിയ ക്രമീകരണങ്ങള്‍ വിമാനത്താവളത്തില്‍ ഒരുക്കിയിട്ടുണ്ട്.