കോഴിക്കോട്/ആലപ്പുഴ: ഓൺലൈൻ ട്രേഡിംഗിന്റെ പേരിലുള്ള സൈബർ തട്ടിപ്പ് കേസുകളിൽ കോഴിക്കോട് സ്വദേശികളായ രണ്ട് യുവാക്കൾ അറസ്റ്റിൽ. കൊടുവള്ളി മുനിസിപ്പൽ 18-ാം വാർഡിൽ കരുവൻപൊയിൽ പടിഞ്ഞാറെ തൊടിയിൽ വീട്ടിൽ മുഹമ്മദ് മിസ്ഫിർ (20), കോഴിക്കോട് ചാത്തമംഗലം പഞ്ചായത്തിലെ മൂന്നാം വാർഡിൽ മുണ്ടോട്ട് പൊയിൽ വീട്ടിൽ ജാബിർ (19) എന്നിവരാണ് ക്രൈംബ്രാഞ്ച് സംഘത്തിന്റെ പിടിയിലായത്.
രണ്ട് വ്യത്യസ്ത തട്ടിപ്പുകളിലാണ് ഇരുവരും കൊടുവള്ളിയിൽ വച്ച് പിടിയിലായത്. മാന്നാറിലെ മുതിർന്ന പൗരന് 2.67 കോടി രൂപ നഷ്ടപ്പെട്ട കേസിൽ ആലപ്പുഴ സൈബർ പോലീസ് രജിസ്റ്റർ ചെയ്ത കേസിലാണ് മുഹമ്മദ് മിസ്ഫിർ പിടിയിലായത്. വെൺമണിയിലെ യുവാവിന് 1.3 കോടി നഷ്ടപ്പെട്ട സംഭവത്തിൽ അമ്മയുടെ അക്കൗണ്ടിലൂടെ ലക്ഷങ്ങൾ പിൻവലിച്ച് തട്ടിപ്പുകാർക്ക് കൈമാറിയതിനാണ് ജാബിർ അറസ്റ്റിലായത്.
ആലപ്പുഴ ജില്ലാ ക്രൈംബ്രാഞ്ച് ഡിവൈ. എസ്.പി. എ സുനിൽരാജിന്റെ നേതൃത്വത്തിൽ എസ്.ഐമാരായ അഗസ്റ്റിൻ വർഗീസ്, എ സുധീർ, എ.എസ്.ഐ ഹരികുമാർ, എസ്.സി.പി.ഒ ബൈജു മോൻ, സി.പി.ഒ എൻ നസീബ് എന്നിവരടങ്ങുന്ന സംഘമാണ് പ്രതികളെ നാട്ടിൽനിന്ന് അറസ്റ്റ് ചെയ്തത്.
ജാബിറിനെ ചെങ്ങന്നൂർ ജ്യുഡിഷ്യൽ ഫസ്റ്റ് ക്ലാസ് മജിസ്‌ട്രേറ്റ് ഒന്നാം കോടതിയിലും മിസ്ഫിറിനെ ആലപ്പുഴ സി.ജെ.എം കോടതിയിലും ഹാജരാക്കി 14 ദിവസത്തേക്ക് റിമാൻഡ് ചെയ്തു.