ന്യൂഡല്‍ഹി– ഓപ്പറേഷന്‍ സിന്ദൂറിന്റെ ഭാഗമായി ഭീകരകേന്ദ്രങ്ങളെ ഇന്ത്യ ലക്ഷ്യമിടുന്നതിനെ കുറിച്ച് പാകിസ്ഥാനെ മുന്‍കൂട്ടി അറിയിച്ചത് കുറ്റകൃത്യമെന്ന് രാഹുല്‍ ഗാന്ധി. കേന്ദ്ര സര്‍ക്കാര്‍ പാകിസ്ഥാനെ ഇക്കാര്യം നേരത്തെ അറിയിച്ചിരുന്നുവെന്ന് ജയശങ്കര്‍ പരസ്യമായി സമ്മതിച്ചിരുന്നതായും രാഹുല്‍ ഗാന്ധി ആരോപിച്ചു. ഈ കുറ്റകൃത്യത്തിന് ആരാണ് അനുമതി നല്‍കിയെന്നതും പാകിസ്ഥാനുമായി ഇക്കാര്യം പങ്കുവെച്ചത് കൊണ്ട് ഇന്ത്യന്‍ വ്യോമസേനയ്ക്ക് എത്ര വിമാനങ്ങള്‍ നഷ്ടപ്പെട്ടുവെന്നും രാഹുല്‍ ഗാന്ധി ചോദിച്ചു. സമൂഹ മാധ്യമമായ എക്‌സിലൂടെയാണ് ജയശങ്കറിനെതിരെ രാഹുല്‍ ഗാന്ധി രംഗത്തെത്തിയത്.
ഇന്ത്യ പാകിസ്ഥാനിലെ ഭീകരവാദ കേന്ദ്രങ്ങള്‍ക്കെതിരായി നടത്തുന്ന നടപടികളെക്കുറിച്ച് എസ് ജയശങ്കര്‍ സ്വകാര്യ ചാനലില്‍ പറയുന്ന വീഡിയോയും രാഹുല്‍ എക്‌സിലൂടെ പങ്കുവച്ചിട്ടുണ്ട്. വീഡിയോയില്‍ സൈന്യത്തിനു നേരെയല്ല മറിച്ച് ഭീകരവാദ കേന്ദ്രങ്ങള്‍ക്ക് നേരെയാണ് ആക്രമണം നടത്തുകയെന്ന് സര്‍ക്കാര്‍ പാകിസ്ഥാന് സന്ദേശം അയച്ചതായി ജയശങ്കര്‍ പറയുന്നത് കേള്‍ക്കാമെന്നും രാഹുല്‍ ഗാന്ധി പറയുന്നു. എന്നാല്‍ ഇക്കാര്യം വാര്‍ത്താ പ്രസ് ഇന്‍ഫര്‍മേഷന്‍ ബ്യൂറോ നിഷേധിച്ചു.