ന്യൂദല്ഹി – തെരഞ്ഞെടുപ്പുമായി ബന്ധപ്പെട്ട് പ്രധാനമന്ത്രി നടത്തുന്നത് വര്ഗീയ പ്രസംഗമാണെന്ന ആരോപണങ്ങള്ക്ക് മറുപടി പറഞ്ഞ് നരേന്ദ്രമോഡി. മതത്തിന്റെ അടിസ്ഥാനത്തില് കോണ്ഗ്രസ് സംവരണം നടപ്പാക്കാന് ശ്രമിച്ചെന്നും ഭരണഘടനാ വിരുദ്ധമായ ഈ നടപടി ചൂണ്ടിക്കാട്ടുകയാണ് താന് ചെയ്തതെന്നും അത് ധ്രുവീകരണമല്ലെന്നും മോഡി പറഞ്ഞു.
ഒരു ഇംഗ്ലീഷ് ദിനപത്രത്തിന് നല്കിയ അഭിമുഖത്തിലാണ് പ്രധാനമന്ത്രിയുടെ പ്രതികരണം. ഏക സിവില് കോഡ് യാഥാര്ഥ്യമാക്കാന് സാധ്യമായ എല്ലാം ചെയ്യും. ഓരോ സമുദായത്തിനും ഓരോ നിയമങ്ങള് എന്നത് സമൂഹത്തിന് നല്ലതല്ല. ഒരു സമുദായം ഭരണഘടനയുടെ പിന്തുണയില് പുരോഗതി നേടുന്നു. മറ്റൊരു സമുദായത്തിന് പ്രീണനത്തിന്റെ പേരില് പുരോഗതി കൈവരിക്കാനാകുന്നില്ല എന്നതാണ് അവസ്ഥയെന്നുമാണ് പ്രധാനമന്ത്രി പറയുന്നത്.
ഇതിനിടെ പെരുമാറ്റച്ചട്ടം ലംഘിച്ച് പ്രസം?ഗിച്ചെന്ന പരാതിയില് പ്രധാനമന്ത്രി നരേന്ദ്രമോഡിയോടും കോണ്ഗ്രസ് നേതാവ് രാഹുല് ഗാന്ധിയോടും തെരഞ്ഞെടുപ്പ് കമ്മീഷന് വിശദീകരണം തേടിയിരുന്നു. ഇരുവരും പെരുമാറ്റ ചട്ടം ലംഘിച്ച് പ്രസംഗിച്ചെന്ന പരാതിയിലാണ് നടപടി. ജനപ്രാതിനിധ്യ നിയമത്തിന്റെ 77-ാം വകുപ്പ് പ്രകാരമായിരുന്നു നടപടി സ്വീകരിച്ചത്. ഇന്ന് 11 മണിക്കുള്ളില് മറുപടി നല്കണമെന്നാണ് തിരഞ്ഞെടുപ്പ് കമ്മീഷന് ഉത്തരവിട്ടിരിക്കുന്നത്.