ന്യൂഡൽഹി: ഒമാൻ തീരത്തുണ്ടായ ഇറാൻ ആക്രമണത്തിൽ കാണാതായ ഇന്ത്യൻ നാവികൻ ഹേരംബ് കർമാർക്കർ മരണപ്പെട്ടതായി ബന്ധുക്കൾ സ്ഥിരീകരിച്ചു. ഹോർമൂസ് കടലിടുക്കിൽ വെച്ച് സൈപ്രസ് പതാകയുള്ള ‘ജിഎഫ്എക്സ് ഗാലക്സി’ എന്ന ചരക്കുകപ്പലിന് നേരെ കഴിഞ്ഞ ഞായറാഴ്ചയാണ് ആക്രമണമുണ്ടായത്. കപ്പലിലെ മറൈൻ എൻജിനീയറും പൂനെ സ്വദേശിയുമായ മുപ്പതുകാരനായ ഹേരംബ്, അപകടമേഖല സുരക്ഷിതമായി പിന്നിട്ടുവെന്നും താൻ സുരക്ഷിതനാണെന്നും കാണിച്ച് കുടുംബത്തിന് മൊബൈൽ സന്ദേശം അയച്ചിരുന്നു. എന്നാൽ ഈ ആശ്വാസ സന്ദേശം അയച്ച് നിമിഷങ്ങൾക്കകം കപ്പലിന് നേരെ വീണ്ടും ആക്രമണമുണ്ടാകുകയായിരുന്നു. കുടുംബത്തിന് ലഭിച്ച ഹേരംബിന്റെ അവസാന സന്ദേശവും ഇതായിരുന്നു.
കപ്പലിലുണ്ടായിരുന്ന മറ്റ് പത്ത് ഇന്ത്യൻ ജീവനക്കാരെ രക്ഷപ്പെടുത്തിയെന്നും ഒരാളെ കാണാതായെന്നും വിദേശകാര്യ മന്ത്രാലയം നേരത്തെ അറിയിച്ചിരുന്നു. എന്നാൽ കാണാതായ ഹേരംബ് കൊല്ലപ്പെട്ട വിവരം ബുധനാഴ്ചയാണ് കുടുംബം ഔദ്യോഗികമായി സ്ഥിരീകരിച്ചത്. വെറും 30 വയസ്സുള്ള തങ്ങളുടെ മകന്റെ മൃതദേഹം എത്രയും വേഗം കേടുപാടുകൾ കൂടാതെ നാട്ടിലെത്തിക്കാൻ സർക്കാർ ഇടപെടണമെന്ന് ഹേരംബിന്റെ അമ്മായിയപ്പൻ വിവേക് ടണ്ടൻ വാർത്താ ഏജൻസിയോട് പറഞ്ഞു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group