പട്ന: പതിറ്റാണ്ടുകളായി ബി.ജെ.പിയുടെ അടിയറവ് പറയാത്ത ഉറച്ച കോട്ടയായിരുന്ന ബാങ്കിപ്പൂരിൽ ജൻ സുരാജ് പാർട്ടി (JSP) അധ്യക്ഷൻ പ്രശാന്ത് കിഷോർ നേടിയ ചരിത്ര വിജയം വെറുമൊരു ഉപതിരഞ്ഞെടുപ്പ് ഫലമല്ല. കേന്ദ്ര ഭരണകൂടത്തിനും ബി.ജെ.പിയുടെ നയങ്ങൾക്കുമെതിരെ രാജ്യവ്യാപകമായി ഉയരുന്ന ജനരോഷത്തിന്റെയും അമർഷത്തിന്റെയും വ്യക്തമായ പ്രതിഫലനമാണ് ഈ രാഷ്ട്രീയ അട്ടിമറിയെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. കേന്ദ്ര വിദ്യാഭ്യാസ മന്ത്രാലയത്തിന്റെ നയങ്ങൾക്കും പരീക്ഷണങ്ങൾക്കുമെതിരെ വിദ്യാർത്ഥി സമൂഹം ആഹ്വാനം ചെയ്ത ശക്തമായ പ്രതിഷേധത്തിന്റെ അനന്തരഫലമായി ബി.ജെ.പിയുടെ അസ്ഥിവാരം ഇളകിയെന്നാണ് ബാങ്കിപ്പൂർ ഫലം വ്യക്തമാക്കുന്നത്. ഡൽഹിയിലെ ജന്തർ മന്തറിൽ ആളിപ്പടർന്ന വിദ്യാർത്ഥി പ്രക്ഷോഭങ്ങളും കേന്ദ്ര വിദ്യാഭ്യാസ മന്ത്രിയുടെ രാജിയും സൃഷ്ടിച്ച രാഷ്ട്രീയ തരംഗം ബി.ജെ.പിക്ക് കനത്ത തിരിച്ചടിയായി മാറുകയാണ്.
‘ജെൻ സി’ തരംഗവും ജനരോഷവും:
രാജ്യത്തെ യുവതലമുറയിലും വിദ്യാർത്ഥികൾക്കിടയിലും ബി.ജെ.പി ഭരണകൂടത്തിനെതിരെ ശക്തമായ വികാരമാണ് നിലനിൽക്കുന്നത്. തൊഴിലില്ലായ്മ, വിദ്യാഭ്യാസ മേഖലയിലെ ആശങ്കകൾ എന്നിവയ്ക്കെതിരെയുള്ള വോട്ടായി ഈ ഉപതിരഞ്ഞെടുപ്പ് മാറി. യുവാക്കളും പുതിയ തലമുറയും ഭരണകൂടത്തിന്റെ പരമ്പരാഗത വോട്ട് ബാങ്ക് രാഷ്ടീയത്തെ പൂർണ്ണമായി തള്ളിക്കളഞ്ഞു.
ദേശീയ തലത്തിലെ പ്രതിഷേധങ്ങളുടെ ആഘാതം:
രാജ്യതലസ്ഥാനത്ത് നടന്ന വിദ്യാർത്ഥി സമരങ്ങളും കേന്ദ്ര ഭരണത്തിൽ ഉയരുന്ന പ്രതിഷേധങ്ങളും കേവലം ഒരു നഗരത്തിൽ മാത്രം ഒതുങ്ങിനിൽക്കുന്നതല്ലെന്നും അത് ഓരോ തിരഞ്ഞെടുപ്പിലും ബി.ജെ.പിക്ക് കനത്ത ആഘാതമേൽപ്പിക്കുമെന്നുമുള്ള മുന്നറിയിപ്പാണ് ബാങ്കിപ്പൂരിലെ വിധി.
പ്രശാന്ത് കിഷോറിന്റെ ബദൽ രാഷ്ട്രീയം:
ബി.ജെ.പി ദേശീയ അധ്യക്ഷൻ നിതിൻ നവീൻ വർഷങ്ങളായി കുത്തകയാക്കി വെച്ചിരുന്ന മണ്ഡലത്തിൽ, ജാതി-മത രാഷ്ട്രീയത്തിനപ്പുറം വികസനവും മാറ്റവും മുൻനിർത്തി പ്രശാന്ത് കിഷോർ നടത്തിയ പ്രചാരണം ബി.ജെ.പി വിരുദ്ധ വോട്ടുകളെ കൃത്യമായി ഏകോപിപ്പിച്ചു.
വികസനത്തിന്റെ 3 മാസ വാഗ്ദാനം
വിജയത്തിന് ശേഷം മാധ്യമങ്ങളോട് സംസാരിച്ച പ്രശാന്ത് കിഷോർ, ബാങ്കിപ്പൂരിൽ വികസനം കൊണ്ടുവരുമെന്ന് ഉറപ്പിച്ചു പറഞ്ഞു. “മൂന്ന് മാസത്തിനുള്ളിൽ ബാങ്കിപ്പൂരിൽ വലിയ മാറ്റങ്ങൾ ദൃശ്യമാകും. അതിനായി ജനങ്ങൾ എനിക്ക് മൂന്ന് മാസത്തെ സമയം നൽകണം,” അദ്ദേഹം വ്യക്തമാക്കി. ബീഹാറിൽ വിദ്യാഭ്യാസവും തൊഴിലവസരങ്ങളും ഉറപ്പാക്കുന്ന ഭരണം വേണമെന്ന ശക്തമായ സന്ദേശമാണ് ജനങ്ങൾ ബി.ജെ.പിയുടെ കേന്ദ്ര നേതൃത്വത്തിന് നൽകിയതെന്നും അദ്ദേഹം കൂട്ടിച്ചേർത്തു.
പരമ്പരാഗത കോട്ടകളിൽ പോലും അടിപതറുന്നത് ബി.ജെ.പിക്ക് എതിരെ രാജ്യവ്യാപകമായി ഉയരുന്ന അമർഷത്തിന്റെ തെളിവാണ്. അതേസമയം, ബി.ജെ.പിയുടെ നീരജ് കുമാർ, ആർ.ജെ.ഡിയുടെ രേഖാ കുമാരി എന്നിവരെ പിന്തള്ളി പ്രശാന്ത് കിഷോർ നേടിയ വിജയം, ദേശീയ രാഷ്ട്രീയത്തിലും പുതിയ ചർച്ചകൾക്ക് വഴിതുറക്കുകയാണ്.