ദുബായ് – ഈ വര്‍ഷത്തെ ബലിപെരുന്നാള്‍ ജൂണ്‍ ആറിന് വെള്ളിയാഴ്ചയായതിനാല്‍ ഈദ് നമസ്‌കാരവും ജുമുഅ നമസ്‌കാരവും പ്രത്യേകം നിശ്ചയിച്ച സമയങ്ങളില്‍ വെവ്വേറെ നിര്‍വഹിക്കണമെന്ന് യു.എ.ഇ ഫത് വ കൗണ്‍സില്‍ വ്യക്തമാക്കി. പെരുന്നാളും വെള്ളിയാഴ്ചയും ഒരുമിച്ചുവരുന്ന സന്ദര്‍ഭങ്ങളില്‍ നമസ്‌കാരവുമായി ബന്ധപ്പെട്ട ബാധ്യതകളെ കുറിച്ച ദീര്‍ഘകാല പണ്ഡിത സംവാദത്തെ കൗണ്‍സില്‍ അഭിസംബോധന ചെയ്തു. ഈദ് ദിനത്തില്‍ തന്നെ ജുമുഅ നമസ്‌കാരം നിര്‍വഹിക്കുന്ന വിഷയം പണ്ഡിതര്‍ക്ക് ചര്‍ച്ചാ വിഷയമാണെങ്കിലും, രണ്ട് നമസ്‌കാരങ്ങളും ഇക്കാര്യത്തിലുള്ള പ്രവാചകചര്യ അനുസരിച്ച് വെവ്വേറെ നിര്‍വഹിക്കണമെന്ന് കൗണ്‍സില്‍ പ്രസ്താവനയില്‍ വ്യക്തമാക്കി.
വിശുദ്ധ ഖുര്‍ആനിലെ സൂക്തങ്ങളെയും പ്രവാചകന്‍ മുഹമ്മദ് നബി (സ) യുടെ അധ്യാപനങ്ങളെയും അടിസ്ഥാനമാക്കിയുള്ളതാണ് ഇക്കാര്യത്തിലുള്ള ഫത്വ കൗണ്‍സിലിന്റെ മതവിധി. ഭൂരിഭാഗം ഇസ്‌ലാമിക പണ്ഡിതരും പ്രമുഖ കര്‍മശാസ്ത്ര സരണികളും ഈ നിലപാടിനെ പിന്തുണക്കുന്നതായും അതിന്റെ നിയമസാധുതയെ കൂടുതല്‍ സ്ഥിരീകരിക്കുന്നതായും കൗണ്‍സില്‍ കൂട്ടിച്ചേര്‍ത്തു.
സൂര്യോദയത്തിന് തൊട്ടുപിന്നാലെയാണ് ഈദ് നമസ്‌കാരം നിര്‍വഹിക്കുന്നത്. ബാങ്ക് വിളി ഇല്ലാതെയാണ് പെരുന്നാള്‍ നമസ്‌കാരം നിര്‍വഹിക്കപ്പെടുന്നത്. നമസ്‌കാരത്തിനു ശേഷം ഈദിന്റെ മൂല്യങ്ങളായ ദൈവത്തിനുള്ള നന്ദി, ത്യാഗം, സാമൂഹിക ഐക്യം എന്നിവക്ക് പ്രാധാന്യം നല്‍കുന്ന ഉദ്‌ബോധന പ്രസംഗം നടത്തുന്നു. വിശ്വാസികള്‍ പുത്തനുടുപ്പുകള്‍ ധരിച്ച് പെരുന്നാള്‍ നമസ്‌കാരത്തിന് സാധാരണയായി വലിയ തുറസ്സായ സ്ഥലങ്ങളിലോ (ഈദ് ഗാഹുകള്‍) പള്ളികളിലോ ഒത്തുകൂടുന്നു.