ദുബൈ – ദുബൈ കെഎംസിസി ആഭിമുഖ്യത്തിൽ യുഎഇ ദേശീയ ദിനാഘോഷമായ ഈദ് അൽ ഇത്തിഹാദ് ഡിസംബർ 2ന് സംഘടിപ്പിക്കും. സെഞ്ച്വറി മാളിന് സമീപത്തെ ശബാബ് അൽ അഹ്ലി ക്ലബ്ബിൽ ഉച്ചയ്ക്ക് 2 മുതൽ രാത്രി 11 മണി വരെയാണ് പരിപാടി സംഘടിപ്പിക്കുന്നത്. 15,000 പേർ പങ്കെടുക്കുന്ന പരിപാടിയിലേക്കുള്ള പ്രവേശനം സൗജന്യമാണ്.
യുഎഇ സാമ്പത്തിക-ടൂറിസം മന്ത്രി അബ്ദുല്ല ബിൻ തൗഖ് അൽ മർറി, പാണക്കാട് സയ്യിദ് സാദിഖലി ശിഹാബ് തങ്ങൾ, എം.എ.യൂസുഫലി തുടങ്ങിയ പ്രമുഖർ പങ്കെടുക്കും. മലബാർ ഗോൾഡ് സ്പോൺസർ ചെയ്യുന്ന കുട്ടികളുടെ വ്യത്യസ്ത കലാ മത്സരങ്ങളുംവിനോദ പരിപാടികളും, സ്ത്രീകൾക്കായുള്ള വിവിധ മത്സരങ്ങളും, വ്യത്യസ്ത ജില്ലകളുടെയും കെ.എം.സി.സി ഹാപ്പിനസ് ടീമിന്റെ പരേഡും, കലാമത്സരങ്ങളും, സിതാര-കണ്ണൂർ ശരീഫ് ടീമിന്റെ സംഗീത വിരുന്നും ഉണ്ടാകും.ഗസ്റ്റ് ഓഫ് ഓണർ ആയി റാപ്പർ ഡബ്‌സിയും എത്തും.
പരിപാടി ചരിത്ര സംഭവമാക്കാനുള്ള പ്രവർത്തനങ്ങളിലാണ് കെഎംസിസി നേതാക്കളും പ്രവർത്തകരും സംഘാടകരായ മീഡിയ ഫാക്ടറി ഇവന്റസ് ആൻഡ് പ്രൊഡക്ഷൻ അധികൃതരും. മീഡിയ ഫാക്ടറി സി.ഇ.ഒ ഷാ മുഹമ്മദ്, കോഡിനേറ്റർ സാബിർ അബ്ദുന്നാസർ, ദുബൈ കെഎംസിസി ഭാരവാഹികളായ അബ്ദുസ്സമദ്,കെ.പി.എ സലാം, അഹമ്മദ് ബിച്ചി എന്നിവർ വാർത്താസമ്മേളനത്തിൽ പങ്കെടുത്തു.