ദുബായ്: വേനല് ചൂട് കനത്തതോടെ ദുബായില് ഒരു വിഭാഗം ജീവനക്കാര്ക്ക് സൗകര്യപ്രദമായ തൊഴില് ദിവസങ്ങള് നിശ്ചയിച്ചു. ദുബായ് സര്ക്കാരിന്റെ മാനവവിഭവശേഷി വകുപ്പിന്റെ പുതിയ ഉത്തരവ് പ്രകാരം സര്ക്കാര് ജീവനക്കാര്ക്ക് ആഴ്ചയില് നാലു ദിവസം മാത്രം ജോലി ചെയ്താല് മതി. ജൂലൈ ഒന്നു മുതല് സെപ്തംബര് 12 വരെയുള്ള കാലയളവിലേക്കാണീ താല്ക്കാലിക ക്രമീകരണം. വിവിധ സര്ക്കാര് വകുപ്പുകള്ക്കും സ്ഥാപനങ്ങള്ക്കും തൊഴില് ദിനങ്ങള് സംബന്ധിച്ച അന്തിമ തീരുമാനമെടുക്കാനുള്ള സ്വാതന്ത്ര്യമുണ്ട്.
ഔദ്യോഗികമായി ദുബായില് ആഴ്ചയില് അഞ്ചു ദിവസമാണ് തൊഴില്ദിനങ്ങള്. ഇതിന് അനുയോജ്യമായി തന്നെയായിരിക്കും ഈ താല്ക്കാലിക ക്രമീകരണവും. ജീവനക്കാരെ രണ്ട് ഗ്രൂപ്പുകളാക്കി തിരിച്ചാണ് ഇതു നടപ്പാക്കുക. ആദ്യ ഗ്രൂപ്പ് തിങ്കളാഴ്ച മുതല് വ്യാഴാഴ്ച വരെ ദിവസവും എട്ടു മണിക്കൂര് ജോലി ചെയ്യും. വെള്ളിയാഴ്ച പൂര്ണ അവധി ആയിരിക്കും. രണ്ടാം ഗ്രൂപ്പ് തിങ്കള് മുതല് വ്യാഴം വരെ ഏഴു മണിക്കൂറും, വെള്ളിയാഴ്ച നാലര മണിക്കൂറും ജോലി ചെയ്യും. സര്ക്കാര് വകുപ്പുകളുടെ വിവേചനാധികാരത്തോടെ ആയിരിക്കും ഈ തൊഴില് സമയ ക്രമീകരണം നടപ്പിലാക്കുക.
കഴിഞ്ഞ വര്ഷവും ദുബായ് സര്ക്കാര് 21 സര്ക്കാര് സ്ഥാപനങ്ങളിളും വകുപ്പുകളിലും ഇത്തരം സമയ ക്രമീകരണം നടപ്പിലാക്കിയിരുന്നു. ഈ പരീക്ഷണ പദ്ധതി മികച്ച വിജയമെന്ന് കണ്ടതോടെയാണ് ഇത്തവണയും നടപ്പിലാക്കുന്നത്. 98 ശതമാനം ജീവനക്കാരുടെയും ഉല്പ്പാദനക്ഷമത മെച്ചപ്പെടുത്തുകയും അവരെ സന്തുഷ്ടരാക്കുകയും ചെയ്തായി കണ്ടെത്തിയിരുന്നു. ദുബായിലെ മിക്ക സര്ക്കാര് ജീവനക്കാര്ക്കും രണ്ടര ദിവസം ആഴ്ചയില് അവധി ലഭിക്കുന്നുണ്ട്. പുതിയ ക്രമീകരണം വരുന്നതോടെ നീണ്ട അവധി ലഭിക്കും.
ഇന്നു മുതല് യുഎഇയില് മധ്യാഹ്ന തൊഴില് നിരോധനം നിലവില് വന്നു. ഉച്ചയ്ക്ക് 12.30 മുതല് വൈകീട്ട് മൂന്ന് മണി വരെ നേരിട്ട് സൂര്യപ്രകാശമേല്ക്കുന്ന ഇടങ്ങളില് ജോലി ചെയ്യുന്നതിനുള്ള വിലക്കാണിത്. സെപ്തംബര് 15 വരെ ഈ നിയന്ത്രണം തുടരും. കമ്പനികള് ഇതു ലംഘിച്ചാല് ഒരു തൊഴിലാളിക്ക് 5000 ദിര്ഹം നിരക്കില് പിഴയടക്കേണ്ടി വരും. പരമാവധി പിഴ അര ലക്ഷം ദിര്ഹം ആണ്.