ദുബൈ– ദുബൈ കെ.എം.സി.സി സംഘടിപ്പിക്കുന്ന ഈദുൽ ഇത്തിഹാദ് ഫെസ്റ്റ് – 2025 നോടനുബന്ധിച്ച് പ്രഖ്യാപിച്ച പ്രഥമ ‘യു.എ.ഇ നാഷനൽ ഡേ എക്സലൻസ് അവാർഡ്’ അൽ മദീന ഗ്രൂപ്പ് ചെയർമാൻ പൊയിൽ അബ്ദുല്ല, കോൺഫിഡണ്ട് ഗ്രൂപ് ചെയർമാൻ ഡോ. സി.ജെ. റോയ് എന്നിവർക്ക് സമ്മാനിക്കുമെന്ന് ഭാരവാഹികൾ അറിയിച്ചു.
പ്രവാസലോകത്തും നാട്ടിലും ബിസിനസ് രംഗത്തുണ്ടാക്കിയ വളര്‍ച്ചയും സാമൂഹ്യസേവന, ജീവകാരുണ്യ മേഖലയില്‍ മാതൃകാപരമായി നടത്തിവരുന്ന ഇടപെടലും മുന്‍നിര്‍ത്തിയാണ് അവാര്‍ഡ് സമ്മാനിക്കുന്നതെന്ന് പ്രസിഡന്റ് ഡോ. അന്‍വര്‍ അമീന്‍, ജനറല്‍ സെക്രട്ടറി യഹ്‌യ തളങ്കര, ട്രഷറര്‍ പി.കെ ഇസ്മായില്‍, റാഷിദ് അസ്‌ലം എന്നിവര്‍ വാര്‍ത്താ സമ്മേളനത്തില്‍ അറിയിച്ചു. ഡിസംബർ രണ്ടിന് ചൊവ്വാഴ്ച ദുബൈ മംസാറിലെ ശബാബ് അൽ അഹ്‌ലി ക്ലബ് ഓപൺ സ്റ്റേഡിയത്തിലാണ് ‘ഈദുൽ ഇത്തിഹാദ് ഫെസ്റ്റ്2025’ എന്ന പേരിൽ ആഘോഷപരിപാടികൾ സംഘടിപ്പിക്കുന്നത്. യു.എ.ഇ സാമ്പത്തിക, ടൂറിസം മന്ത്രി അബ്ദുല്ല ബിൻ തൂഖ് അൽ മർറി ദേശീയ ദിനാഘോഷ പരിപാടി ഉദ്ഘാടനം ചെയ്യും. പാണക്കാട് സാദിഖലി ശിഹാബ് തങ്ങൾ, എം.എ. യൂസുഫലി എന്നിവർ മുഖ്യാതിഥികളാകും.
വാർത്തസമ്മേളനത്തിൽ സംസ്ഥാന ഭാരവാഹികളായ ഇസ്മയിൽ ഏറാമലകെ.പി.എ സലാം, ഇബ്രാഹിം മുറിച്ചാണ്ടി, എ.സി. ഇസ്മയിൽ, അബ്ദുല്ല ആറങ്ങാടി, ഹംസ തൊട്ടിയിൽ, ഒ. മൊയ്തു, ബാബു എടക്കുളം, പിവി. നാസർ, അഡ്വ. ഇബ്രാഹിം ഖലീൽ, അഫ്സൽ മെട്ടമ്മൽ, റഈസ് തലശ്ശേരി, അഹമ്മദ് ബിച്ചി, നാസർ മുല്ലക്കൽ, ഷഫീഖ് സലാഹുദ്ദീൻ എന്നിവരും പങ്കെടുത്തു.