അബുദാബി: കളിക്കിടെ കളത്തില് കലഹമുണ്ടാക്കിയ കുറ്റത്തിന് മൂന്ന് ഫുട്ബോള് താരങ്ങള്ക്ക് യുഎഇയില് ഒരു മാസം തടവും രണ്ടു ലക്ഷം ദിര്ഹം പിഴയും ശിക്ഷ. ഈജിപ്തിലെ പ്രമുഖ ക്ലബായ സമാലിക് താരങ്ങള്ക്കാണ് ശിക്ഷ ഏറ്റുവാങ്ങേണ്ടി വന്നത്. ഈ മാസം 20ന് അബുദബിയില് നടന്ന ഈജിപ്ഷ്യന് സൂപ്പര് കപ്പ് സെമി ഫൈനല് മത്സരത്തിനിടെയാണ് സംഭവം. പിരമിഡ്സ് ക്ലബിനെതിരെയുള്ള മാച്ചിനിടെ ഈ താരങ്ങള് സെക്യൂരിറ്റി ഉദ്യോഗസ്ഥരെ ആക്രമിക്കുകയും കലഹമുണ്ടാക്കുകയും ചെയ്തെന്നാണ് കുറ്റം.
കളി നടന്ന തൊട്ടടുത്ത ദിവസം നബീല് ഇമാദ് ദോംഗ, മുസ്തഫ ശലബി, അബ്ദല് വാഹിദ് അല് സയിദ് എന്നിവരെ പൊലീസ് ചോദ്യം ചെയ്യാന് വിളിപ്പിച്ചിരുന്നതായി അറബ് മാധ്യമങ്ങള് റിപ്പോര്ട്ട് ചെയ്യുന്നു. താരങ്ങള്ക്കെതിരായ കുറ്റം തെളിയിക്കപ്പെട്ടതായി കോടതി വ്യക്തമാക്കി. സാക്ഷി മൊഴികളുടേയും സെക്യൂരിറ്റ് കാമറ ദൃശ്യങ്ങളുടേയും അടിസ്ഥാനത്തിലാണ് ഇവര് കുറ്റക്കാരാണെന്ന് കോടതി കണ്ടെത്തിയത്.