മക്ക – ഹജ് നിര്‍വഹിക്കുകയെന്ന ലക്ഷ്യത്തോടെ അനധികൃതമായി രാജ്യത്ത് തങ്ങിയ വിസിറ്റ് വിസക്കാര്‍ക്ക് ആതിഥേയത്വം നല്‍കിയവര്‍ അടക്കം 16,190 വിസാ നിയമ ലംഘകര്‍ക്ക് ഓട്ടോമാറ്റിക് ആയി പിഴകള്‍ ചുമത്തിയതായി പൊതുസുരക്ഷാ വകുപ്പ് മേധാവിയും ഹജ് സുരക്ഷാ കമ്മിറ്റി ചെയര്‍മാനുമായ ലെഫ്. ജനറല്‍ മുഹമ്മദ് അല്‍ബസ്സാമി അറിയിച്ചു. ഹജ് ഒരുക്കങ്ങള്‍ അറിയിക്കാന്‍ ഹജ് സുരക്ഷാ സേനയില്‍ പങ്കാളിത്തം വഹിക്കുന്ന സുരക്ഷാ വകുപ്പ് മേധാവികള്‍ പങ്കെടുത്ത പത്രസമ്മേളനത്തില്‍ സംസാരിക്കുകയായിരുന്നു പൊതുസുരക്ഷാ വകുപ്പ് മേധാവി. പെര്‍മിറ്റ് ഇല്ലാതെ ഹജ് നിര്‍വഹിക്കാന്‍ ശ്രമിച്ചതിന് 2,05,000 ലേറെ പേരെ സുരക്ഷാ വകുപ്പുകള്‍ മക്കയില്‍ നിന്ന് നീക്കം ചെയ്തു.
ഹജ് സീസണില്‍ നിയമ ലംഘകരെ നേരിടാന്‍ നിയമനിര്‍മാണം ഏര്‍പ്പെടുത്തിയിട്ടുണ്ട്. 75,000 ലേറെ ഹജ് നിയമ ലംഘകര്‍ക്ക് പിഴ ചുമത്തിയിട്ടുണ്ട്. അനധികൃത തീര്‍ഥാടകരെ മക്കയിലേക്ക് കടത്താന്‍ ശ്രമിച്ച 1,239 പേരെ സുരക്ഷാ സംഘങ്ങള്‍ അറസ്റ്റ് ചെയ്തു. അനധികൃത തീര്‍ഥാടകരെ കയറ്റിയതിന് മക്കയിയുടെ പ്രവേശന കവാടങ്ങളില്‍ വെച്ച് പൊതു സുരക്ഷാ വകുപ്പ് 1,10,000 ഓളം വാഹനങ്ങള്‍ തിരിച്ചുവിട്ടു. പെര്‍മിറ്റില്ലാത്ത തീര്‍ഥാടകരെ കടത്താന്‍ ശ്രമിച്ച 5,000 ലേറെ വാഹനങ്ങള്‍ കസ്റ്റഡിയിലെടുത്തിട്ടുമുണ്ട്. നിയമലംഘകരെ പിടികൂടാനായി മക്കയയുടെ പ്രവേശന കവാടങ്ങളില്‍ പൊതുസുരക്ഷാ വകുപ്പ് സ്ഥിരം സുരക്ഷാ ചെക്ക്പോസ്റ്റുകള്‍ ആരംഭിച്ചിട്ടുണ്ടെന്നും പൊതുസുരക്ഷാ വകുപ്പ് മേധാവി പറഞ്ഞു.
ആശുപത്രികളിലും റിഹാബിലിറ്റേഷന്‍ സെന്ററുകളിലും മറ്റും കഴിയുന്ന തിരിച്ചറിയാത്ത തീര്‍ഥാടകരെ വിരലടയാള പരിശോധനയിലൂടെ തിരിച്ചറിയാന്‍ ഫീല്‍ഡ് ടീമുകളെ ജവാസാത്ത് ഡയറക്ടറേറ്റ് പുണ്യസ്ഥലങ്ങളിലുടനീളം വിന്യസിച്ചിട്ടുണ്ടെന്ന് സൗദി ജവാസാത്ത് ആക്ടിംഗ് മേധാവി മേജര്‍ ജനറല്‍ സ്വാലിഹ് അല്‍മുറബ്ബ പറഞ്ഞു. വിരലടയാള പരിശോധനക്കുള്ള ഉപകരണങ്ങള്‍ അടങ്ങിയ മൊബൈല്‍ കിറ്റുകള്‍ ഫീല്‍ഡ് സംഘങ്ങളുടെ പക്കലുണ്ടെന്നും ജവാസാത്ത് മേധാവി പറഞ്ഞു.