ജിദ്ദ – ലോകമെമ്പാടുമുള്ള മുസ്‌ലിംകള്‍ 2039 ല്‍ അത്യപൂര്‍വ സംഭവത്തിന് സാക്ഷ്യം വഹിച്ച് ഒരു ഗ്രിഗോറിയന്‍ കലണ്ടര്‍ വര്‍ഷത്തിനുള്ളില്‍ മൂന്ന് പെരുന്നാളുകള്‍ ആഘോഷിക്കും. ആധുനിക ഓര്‍മ്മയില്‍ കണ്ടിട്ടില്ലാത്തതും അടുത്തെങ്ങും ആവര്‍ത്തിക്കാന്‍ സാധ്യതയില്ലാത്തതുമായ ഒരു പ്രതിഭാസമാണിത്. ഇത് അമ്പരപ്പിക്കുന്നതായി തോന്നുമെങ്കിലും, ചാന്ദ്ര, സൗര കലണ്ടറുകള്‍ തമ്മിലുള്ള പരസ്പര ബന്ധത്താല്‍ ഇത് പൂര്‍ണമായും വിശദീകരിക്കപ്പെടുന്നു.
സൗദി അറേബ്യയിലെ പ്രശസ്ത കാലാവസ്ഥാ, ജ്യോതിശാസ്ത്ര വിദഗ്ധനായ ഡോ. അബ്ദുല്ല അല്‍മിസ്‌നദിന്റെ അഭിപ്രായത്തില്‍, അസാധാരണമായ ഈ പ്രതിഭാസം ഇസ്ലാമിക ചാന്ദ്ര കലണ്ടറും സൗര ഗ്രിഗോറിയന്‍ കലണ്ടറും തമ്മിലുള്ള മാറ്റത്തില്‍ നിന്നാണ് ഉണ്ടാകുന്നത്. ചാന്ദ്ര കലണ്ടര്‍ ഓരോ വര്‍ഷവും ഏകദേശം 11 ദിവസം മുന്നോട്ട് പോകുന്നു. ഈ വ്യത്യാസം 2039 ല്‍ ശ്രദ്ധേയമായ ഒരു ഒത്തുചേരലിലേക്ക് നയിക്കും. ഹജിന്റെ പരമ്പരാഗത പരിസമാപ്തിയും ത്യാഗത്തിന്റെ പ്രധാന ആഘോഷവുമായ ബലിപെരുന്നാള്‍ 2039 ജനുവരി ആറിന് (ഹിജ്‌റ 1460 ദുല്‍ഹജ് 10) വരുന്നതോടെ വര്‍ഷം ആരംഭിക്കും. എന്നാല്‍ ആ വര്‍ഷത്തെ ഏക ബലിപെരുന്നാള്‍ മാത്രമായിരിക്കില്ല അത്.
ഏകദേശം 12 മാസങ്ങള്‍ക്കു ശേഷം ചാന്ദ്ര കലണ്ടര്‍ വീണ്ടും അതിന്റെ പൂര്‍ണ ചക്രം പൂര്‍ത്തിയാക്കുകയും രണ്ടാമത്തെ ഹജ് സീസണ്‍ ആരംഭിക്കുകയും ചെയ്യും. 1461 ലെ ദുല്‍ ഹജ് 10 ബലിപെരുന്നാള്‍ 2039 ഡിസംബര്‍ 26 ന് ആയിരിക്കും. ഇതിനര്‍ഥം ഒരു സൗര വര്‍ഷത്തിനുള്ളില്‍ രണ്ടു തവണ ഹജ് കര്‍മം നിര്‍വഹിക്കപ്പെടും. ഇത് വളരെ അപൂര്‍വമായ സംഭവമാണ്.
2039 ലെ രണ്ടു ബലിപെരുന്നാളുകള്‍ക്കിടയില്‍ 2039 ഒക്‌ടോബര്‍ 19 ന് ഈദുല്‍ ഫിത്‌റും ആഘോഷിക്കും. ഒരു വര്‍ഷത്തില്‍ മൂന്ന് പെരുന്നാളുകള്‍. ചാന്ദ്ര കലണ്ടറിന്റെ മാറ്റം ഹജ് സീസണില്‍ മാത്രം ഒതുങ്ങുന്നില്ല. വ്രതാനുഷ്ഠാനത്തിന്റെയും ആത്മീയ ധ്യാനത്തിന്റെയും ഏറ്റവും പുണ്യമാസമായ റമദാനിലും സമീപഭാവിയില്‍ സമാനമായ സംഭവം ആവര്‍ത്തിക്കും. 2030 ല്‍ മുസ്‌ലിംകള്‍ ഒരേ ഗ്രിഗോറിയന്‍ വര്‍ഷത്തില്‍ തന്നെ രണ്ട് റമദാന്‍ ആചരിക്കും. ഒന്ന് ജനുവരിയില്‍ ആരംഭിക്കുകയും മറ്റൊന്ന് ഡിസംബറില്‍ ആരംഭിക്കുകയും ചെയ്യും. 1997 ല്‍ അവസാനമായി സംഭവിച്ചതിന് ശേഷം 33 വര്‍ഷത്തിനിടെ നടക്കുന്ന ആദ്യത്തെ ഇരട്ട റമദാന്‍ ആയിരിക്കും അത്.
ഇസ്‌ലാമിക് ഹിജ്‌റ കലണ്ടര്‍ ചന്ദ്രന്റെ ഉദയാസ്തമയങ്ങളെ അടിസ്ഥാനമാക്കിയുള്ളതാണ്. അതില്‍ 354 അല്ലെങ്കില്‍ 355 ദിവസങ്ങളാണുള്ളത്. സൗരചക്രം പിന്തുടരുന്ന ഗ്രിഗോറിയന്‍ കലണ്ടറില്‍ 365, അല്ലെങ്കില്‍ 366 ദിവസങ്ങള്‍ അടങ്ങിയിരിക്കുന്നു. ഈ പൊരുത്തക്കേട് കാരണം ഇസ്ലാമിക തീയതികള്‍ ഓരോ വര്‍ഷവും ഏകദേശം 10 മുതല്‍ 11 ദിവസം വരെ നേരത്തെ മാറും.