ജിദ്ദ: ജിദ്ദ ഇന്ത്യൻ ഇസ്ലാഹി സെന്ററിൻ്റെ കീഴിൽ പ്രവർത്തിക്കുന്ന ശൈഖുൽ ഇസ്ലാം ഇബ്നു തൈമിയ്യ സെൻ്റർ വിദ്യാർഥികൾക്കായുള്ള 2024-25 വർഷത്തെ കായിക മത്സരങ്ങൾ സംഘടിപ്പിച്ചു. വിദ്യാർത്ഥികളുടെ കായികമായ അഭിരുചിയെ തിരിച്ചറിയുന്നതിനും പരിപോഷിപ്പിക്കുന്നതിനുമായി ശൈഖുൽ ഇസ്ലാം ഇബ്നു തൈമിയ്യ സെൻ്റർ വർഷം തോറും നടത്തിവരാറുള്ള കായിക മത്സരങ്ങൾക്ക് വർണ്ണാഭമായ തുടക്കമായിരുന്നു.
ആൺകുട്ടികളെയും പെൺകുട്ടികളെയും സീനിയർ ജൂനിയർ എന്നീ വിഭാഗങ്ങളാക്കി ബ്ലു, യെല്ലോ, ഗ്രീൻ, റെഡ് എന്നീ ഹൗസുകളിൽ വ്യത്യസ്ത കായിക മത്സരങ്ങൾ സംഘടിപ്പിച്ചു.നാല് ഹൗസുകളുടെയും മാർച്ച് പാസ്റ്റോടുകൂടി ആരംഭിച്ച കായിക മത്സരങ്ങളിൽ ഹൗസ് ലീഡർമാരിൽ നിന്നും സല്യൂട്ട് സ്വീകരിച്ചുകൊണ്ട് അഹ്ദാബ് സ്കൂൾ പ്രിൻസിപ്പാൾ അൻവർ ഷാജഹാൻ ഉദ്ഘാടനം നിർവഹിച്ചു. കായിക മത്സരങ്ങളോടൊപ്പം തന്നെ ധാർമികമായ വിദ്യാഭ്യാസവും വിദ്യാർത്ഥികൾക്ക് നൽകുന്നതിലൂടെ അവരെ സാംസ്കാരികമായി വളർത്തിക്കൊണ്ടുവരുന്നതിൽ ശൈഖുൽ ഇസ്ലാം ഇബ്നു തൈമിയ്യ സെന്റർ വളരെ വലിയ പങ്കാണ് നിർവഹിക്കുന്നതെന്ന് അദ്ദേഹം പറഞ്ഞു. വാശിയേറിയ കായിക മാമാങ്കം കൊടിയിറങ്ങിയപ്പോൾ ആൺകുട്ടികളിൽ 63 പോയിൻറ് കരസ്ഥമാക്കിയ ഗ്രീൻ ഹൗസും പെൺകുട്ടികളിൽ 69 പോയിൻറ് കരസ്ഥമാക്കിയ റെഡ് ഹൗസും ഒന്നാമതെത്തി.
സീനിയർ ആൺകുട്ടികളിൽ റിഹാനും(യെല്ലോ ഹൗസ് ) സയീം മൻസൂറും( ഗ്രീൻ ഹൗസ്) സീനിയർ പെൺകുട്ടികളിൽ ജെന്നാ മെഹക്കും ( ഗ്രീൻ ഹൗസ്) ജൂനിയർ ആൺകുട്ടികളിൽ റയാനും (റെഡ് ഹൗസ്) ജൂനിയർ പെൺകുട്ടികളിൽ റുവാ ഹനീനും (റെഡ് ഹൗസ്) വ്യക്തിഗത ചാമ്പ്യൻഷിപ്പ് കരസ്ഥമാക്കി.
ഓട്ട മത്സരം , കബഡി, ഫുട്ബോൾ, ബലൂൺ ബെസ്റ്റിംഗ്, മ്യൂസിക്കൽ ചെയർ, ബാൾ ഗാതറിംഗ്, റിലെ മത്സരം , സാക്ക് റെയ്സ് , റിംഗ് പാസിംഗ് , ലെമൺ ഇൻ സ്പൂൺ, വടം വലി തുടങ്ങിയ മത്സരങ്ങളിൽ വാശിയേറിയ പോരാട്ടം വിദ്യാർത്ഥികൾ കാഴ്ചവെച്ചു. അബ്ദുൽ റഊഫ് തിരൂരങ്ങാടി മത്സരാർത്ഥികൾക്ക് ആവശ്യമായ നിർദ്ദേശങ്ങളും പരിശീലനവും നൽകി. അദ്ധ്യാപികമാരുടേയും ഇസ്ലാഹി സെന്റർ ലേഡീസ് വിംഗ് വളണ്ടിയർമാരുടേയും സേവനം അഭിനന്ദനാർഹമായിരുന്നു.അസ്ഫാനിലെ അൽസഫ്വാ ഇസ്തിറാഹയിൽ വെള്ളിയാഴ്ച നടന്ന ജുമുഅ ഖുതുബക്ക് ഇസ്സുദ്ദീൻ സലാഹി നേതൃത്വം നൽകി. മത്സരത്തിൽ വിജയികളായവർക്ക് ജിദ്ദ ഇന്ത്യൻ ഇസ്ലാഹി സെൻറർ ഭാരവാഹികളും ശൈഖുൽ ഇസ്ലാം ഇബ്നു തൈമിയ സെൻ്റർ അദ്ധ്യാപകരും മെഡലുകൾ സമ്മാനിച്ചു. ജിദ്ദ ഇന്ത്യൻ ഇസ്ലാഹി സെന്റർ ഭാരവാഹികളും സെൻ്റർ വളണ്ടിയേഴ്സും കായിക മത്സരങ്ങൾക്ക് നേതൃത്വം നൽകി. വിദ്യാർത്ഥികളുടെ സർഗാത്മക കഴിവുകൾ പരിപോഷിപ്പിക്കുന്നതിന് വേണ്ടിയുള്ള കലാപരിപാടികൾ ഫെബ്രുവരി 6 , 7 തീയതികളിൽ നടത്താൻ തീരുമാനിച്ചിരിക്കുന്നതായി ഭാരവാഹികൾ അറിയിച്ചു.