ജിദ്ദ – അപകടമുണ്ടാക്കിയ യുവതി കാറുടമയായ സൗദി യുവാവിനോട് ക്ഷമാപണം നടത്തിയത് വിചിത്ര രീതിയില്‍. കഴിഞ്ഞ ദിവസമാണ് സംഭവം. റോഡ് സൈഡില്‍ നിര്‍ത്തിയിട്ട യുവാവിന്റെ കാറില്‍ യുവതിയുടെ കാര്‍ ഇടിക്കുകയായിരുന്നു. ഈ സമയത്ത് യുവാവ് സ്ഥലത്തുണ്ടായിരുന്നില്ല. അപകടം മനസ്സിലാക്കിയ യുവതി ഇതില്‍ ക്ഷമാപണം നടത്തിയുള്ള കത്തും 10 റിയാലും യുവാവിന്റെ കാറിന്റെ മുന്‍വശത്തെ ചില്ലില്‍ വെച്ച് സ്ഥലം വിട്ടു.
തിരക്കിലായതിനാലാണ് കാറുടമയെ കാത്തുനില്‍ക്കാതെ സ്ഥലം വിടുന്നതെന്നും കാറില്‍ ഇടിച്ചതില്‍ ക്ഷമ ചോദിക്കുന്നതായും കത്തില്‍ യുവതി പറഞ്ഞു. അപകടത്തില്‍ കാറിലുണ്ടായ കേടുപാടുകള്‍ തീര്‍ക്കാന്‍ ഒരു തുക കത്തിനൊപ്പം വെക്കുന്നതായും യുവതി കുറിപ്പില്‍ പറഞ്ഞു. 10 റിയാലാണ് യുവതി കത്തിനൊപ്പം വെച്ചത്.
തകരാറ് നന്നാക്കാന്‍ യുവതി കത്തിനൊപ്പം വെച്ച തുകയില്‍ യുവാവ് പരാതിപ്പെട്ടു. പത്തു റിയാലിന് തന്റെ കുഞ്ഞുസഹോദരിക്ക് കിന്‍ഡര്‍ മുട്ട മിഠായി വാങ്ങിക്കൊടുക്കും. തന്റെ മനസ്സ് നല്ലതാണെന്നും യുവതിക്കെതിരെ നിയമ നടപടികളൊന്നും സ്വീകരിക്കില്ലെന്നും യുവതിയുടെ കത്തും യുവതിയുടെ കാറിടിച്ച് തന്റെ കാറിലുണ്ടായ കേടുപാടുകളും പ്രദര്‍ശിപ്പിച്ച് സാമൂഹികമാധ്യമങ്ങളില്‍ പോസ്റ്റ് ചെയ്ത വീഡിയോയില്‍ സൗദി യുവാവ് പറഞ്ഞു.