ദമാം – കിഴക്കന്‍ പ്രവിശ്യയില്‍ പെട്ട അല്‍ഹസയില്‍ പബ്ലിക് ബസ് പദ്ധതി പരീക്ഷണാടിസ്ഥാനത്തില്‍ പ്രവര്‍ത്തനം ആരംഭിച്ചു. ഇതോടെ സേവന മേഖലയില്‍ അല്‍ഹസ പുതിയ ഘട്ടത്തിന് തുടക്കം കുറിച്ചു. ആധുനികവും സുസ്ഥിരവുമായ ഗതാഗത പരിഹാരങ്ങള്‍ നല്‍കി ആയിരക്കണക്കിന് പ്രദേശവാസികള്‍ക്കും സന്ദര്‍ശകര്‍ക്കും സേവനം നല്‍കുക എന്ന ലക്ഷ്യത്തോടെയുള്ള ഈ പദ്ധതി ഗുണപരമായ കുതിച്ചുചാട്ടമാണ്.
അല്‍ഹസയിലെ ഏറ്റവും പ്രധാനപ്പെട്ട പ്രദേശങ്ങള്‍ ഉള്‍പ്പെടുത്തി ശ്രദ്ധാപൂര്‍വം നിശ്ചയിച്ച 132 സ്റ്റോപ്പുകള്‍ ഉള്‍പ്പെടെ ആകെ 222 കിലോമീറ്റര്‍ ദൈര്‍ഘ്യമുള്ള ഏഴ് പ്രധാന റൂട്ടുകളാണ് പദ്ധതിയുടെ ആദ്യ ഘട്ടത്തില്‍ അടങ്ങിയിരിക്കുന്നതെന്ന് അല്‍ഹസ നഗരസഭ പറഞ്ഞു. ഈ ശൃംഖലയില്‍ 41 ആധുനിക ബസുകള്‍ ദിവസേന 18 മണിക്കൂര്‍ സര്‍വീസ് നടത്തുന്നു.
അവസരങ്ങള്‍ സ്വദേശിവല്‍ക്കരിക്കാനും സ്വദേശി ജീവനക്കാരുടെ ശേഷികള്‍ വികസിപ്പിക്കാനുമുള്ള പബ്ലിക് ബസ് പദ്ധതിയുടെ പ്രതിബദ്ധത പ്രതിഫലിപ്പിക്കുന്ന നിലക്ക് ബസുകള്‍ പ്രവര്‍ത്തിപ്പിക്കാന്‍ സൗദി ഡ്രൈവര്‍മാരെ മാത്രമാണ് നിയോഗിച്ചിരിക്കുന്നത്. ആകെ 123 സൗദി ഡ്രൈവര്‍മാരെയാണ് ബസുകളില്‍ നിയമിച്ചിരിക്കുന്നത്. ഇതിലൂടെ ഈ സുപ്രധാന വ്യവസായത്തിന്റെ വികസനത്തിനും സേവനങ്ങളുടെ ഗുണനിലവാരം മെച്ചപ്പെടുത്താനും അല്‍ഹസ നിവാസികളായ സൗദി പൗരന്മാര്‍ നേരിട്ട് സംഭാവന നല്‍കുന്നു.
അല്‍ഹസയില്‍ ഗതാഗതം സുഗമമാക്കുകയും ജീവിത നിലവാരം ഉയര്‍ത്തുകയും ഗതാഗത സുരക്ഷ വര്‍ധിപ്പിക്കാന്‍ സഹായിക്കുകയും ചെയ്യുന്ന ഒന്നിലധികം ഓപ്ഷനുകള്‍ നല്‍കാനാണ് പദ്ധതിയിലൂടെ പ്രധാനമായും ലക്ഷ്യമിടുന്നത്. ദേശീയ ഗതാഗത, ലോജിസ്റ്റിക്‌സ് സര്‍വീസ് തന്ത്രത്തിന്റെ ലക്ഷ്യങ്ങള്‍ക്ക് അനുസൃതമായി, കാര്‍ബണ്‍ ബഹിര്‍ഗമനവും പരിസ്ഥിതി മലിനീകരണവും പ്രധാന റോഡുകളിലെ ഗതാഗത തിരക്കും കുറക്കുന്നതില്‍ വ്യക്തമായ പോസിറ്റീവ് സ്വാധീനം ചെലുത്താന്‍ പദ്ധതിക്ക് കഴിയുമെന്ന് പ്രതീക്ഷിക്കുന്നു.
ഉയര്‍ന്ന വഴക്കവും കുറഞ്ഞ പ്രവര്‍ത്തന ചെലവും പദ്ധതിയുടെ സവിശേഷതയാണ്. പദ്ധതിക്ക് ചെലവേറിയ അടിസ്ഥാന സൗകര്യങ്ങളുടെ നിര്‍മാണം ആവശ്യമില്ല. ഇത് ഭാവിയില്‍ പബ്ലിക് ബസ് പദ്ധതി ശൃംഖല എളുപ്പത്തില്‍ പരിഷ്‌കരിക്കാനും വികസിപ്പിക്കാനും അനുവദിക്കുമെന്ന് അല്‍ഹസ നഗരസഭ അഭിപ്രായപ്പെട്ടു.