റിയാദ്: ഉപഭോക്താക്കൾ കാത്തിരുന്ന ഒരു മഹാ ഓഫറുമായി ലുലു ഹൈപർമാർക്കറ്റ്. സൗദിയിലെ ലുലുവിന്റെ ചരിത്രത്തിൽ ആദ്യമായി എല്ലാ വിഭാഗങ്ങളിലും 50 ശതമാനം വിലക്കുറവ് പ്രഖ്യാപിച്ചു. ഫാഷൻ, ഇലക്ട്രോണിക്സ്, ഗ്രോസറി സാധനങ്ങൾ, വിവിധ ഭക്ഷ്യവസ്തുക്കൾ, മത്സ്യമാംസാദികൾ, ബേക്കറി, ഹെൽത്ത് ആന്റ് ബ്യൂട്ടി തുടങ്ങി എല്ലാ വിഭാഗങ്ങളിലും ഓഗസ്റ്റ് 28 മുതൽ 31 വരെ നാലു ദിവസം നീണ്ടുനിൽക്കുന്ന ഓഫറാണ് ഏർപ്പെടുത്തിയിരിക്കുന്നത്. സൗദിയിലെ എല്ലാ ലുലു ഹൈപ്പർ മാർക്കറ്റുകളിലും ഈ ഓഫർ ലഭ്യമാണ്.
50 ശതമാനം വിലക്കിഴിവിന്റെ വിസ്മയകരമായ ആനുകൂല്യമാണ് ഒരുക്കുന്നത്. ദൈനംദിന ആവശ്യത്തിനുള്ള എല്ലാവിധ ഉപഭോക്തൃ സാധനങ്ങൾക്കൊപ്പം സ്കൂൾ തുറന്ന പശ്ചാത്തലത്തിൽ വിദ്യാർഥികൾക്കാവശ്യമായ ബാഗ്, ബുക്ക്, പേന, വാട്ടർ ബോട്ടിൽ തുടങ്ങി മുഴുവൻ സ്റ്റേഷനറി സാധനങ്ങൾക്കും വില പകുതി മാത്രം.
ലുലു സൗദിയിൽ പുതിയ ചരിത്രമെഴുതുന്ന ഈ മഹാ ഓഫറിന്റെ ലോഞ്ചിങ് പ്രശസ്ത ചലച്ചിത്ര താരം ടൊവീനോ തോമസും ദേശീയ ചലച്ചിത്ര പുരസ്കാര ജേതാവ് സുരഭി ലക്ഷ്മിയും ചേർന്ന് നിർവഹിച്ചു. റിയാദിലെ മലസ് ലുലു ഹൈപർമാർക്കറ്റിന്റെ റൂഫ് അരീനയിൽ വേദിയൊരുങ്ങിയ ടൊവീനോയുടെ ഏറ്റവും പുതിയ ചലച്ചിത്രം ‘എ.ആർ.എമ്മി’ന്റെ പ്രീ റിലീസ് വേൾഡ് വൈഡ് പ്രമോഷൻ പരിപാടിക്കിടെ നടന്ന ലോഞ്ചിങ് ചടങ്ങിൽ ലുലുവിലെ ഉദ്യോഗസ്ഥരും പങ്കെടുത്തു.