ജിദ്ദയിൽ നാളെ നവോദയയുടെ ആഘോഷരാവ്, കേരളത്തെ പുനർജനിപ്പിച്ച് ദൃശ്യാവിഷ്കാരങ്ങൾ

ജിദ്ദ- നവോദയയുടെ മുപ്പത്തിയഞ്ചാം വാർഷികത്തിന്റെ ഭാഗമായി ഒരു വർഷം നീണ്ടുനിൽക്കുന്ന പരിപാടിയോടനുബന്ധിച്ച് ജിദ്ദയിൽ നാളെ(വെള്ളി) കേരളീയം 2024 ആഘോഷരാവ്. കേളു എട്ടൻ പഠനഗവേഷണ കേന്ദ്രം ഡയറക്ടർ കെ.ടി കുഞ്ഞിക്കണ്ണൻ മുഖ്യാതിഥിയായി പങ്കെടുക്കുന്ന പരിപാടി ജിദ്ദയിലെ ലയാലി നൂർ ഓഡിറ്റോറിയത്തിലാണ്. പിന്നിട്ട കേരളവും ആധുനിക കേരളവും വിശദമായി കെ.ടി കുഞ്ഞിക്കണ്ണൻ പ്രവാസികളുമായി സംവദിക്കും.

ദമാമിലെ നാട്ടരങ്ങ് നാടൻ പാട്ടുകൂട്ടം അവതരിപ്പിക്കുന്ന ചെണ്ടമേളം, ദൃശ്യാവിഷ്കാരം തുടങ്ങിയ നിരവധി പരിപാടികളും സംഘടിപ്പിച്ചിട്ടുണ്ട്. പ്രവാസികളുടെ ഗൃഹാതുര ഓർമ്മകളുടെ പുനരാവിഷ്കാരം ഒരുക്കിയിട്ടുണ്ടെന്ന് ജിദ്ദ നവോദയ കേന്ദ്ര കമ്മിറ്റി ഭാരവാഹികൾ അറിയിച്ചു. വാർഷികത്തോടനുബന്ധിച്ച് ഫുട്ബോൾ മത്സരവും വൈകാതെ സംഘടിപ്പിക്കും.