താഇഫ്– കുടുംബസമേതം ഉംറ ചെയ്ത് ജോലി സ്ഥലമായ ദമാമിലേക്ക് മടങ്ങുന്നതിനിടെ ഹൃദയാഘാതത്തെ തുടർന്ന് മരണപ്പെട്ട മുംബൈ സ്വദേശി മുഖാദം മുഷ്താഖ് അഹമ്മദ് കുതുബുദ്ധീൻ്റെ മൃതദേഹം മറവ് ചെയ്തു. താഇഫിലെ സെയിൽ കബീർ ജുഫാലി ഖബർസ്ഥാനിലാണ് മറവ് ചെയ്തത്. മക്ക-റിയാദ് റോഡിലെ സെയിൽ കബീർ പെട്രോൾ പമ്പിൽ വെച്ചാണ് ഇദ്ദേഹത്തിന് നെഞ്ചുവേദന അനുഭവപ്പെട്ടത്. ഉടനെ ഹവിയയിലെ നഹ്ദ ഹോസ്പിറ്റലിൽ പ്രവേശിപ്പിച്ച് പ്രാഥമിക ചികിത്സ നൽകുകയും ശേഷം താഇഫ് കിംഗ് അസീസ് ഹോസ്പിറ്റലിലേക്ക് മാറ്റി വിദഗ്ധ ചികിത്സ നൽക്കുകയും ചെയ്തെങ്കിലും രാത്രിയോടെ മരണപ്പെടുകയുമായിരുന്നു.
മരണ സമയത്ത് ഭാര്യയും മകനും കൂടെയുണ്ടായിരുന്നു. ഇവരെ കൂടാതെ ഒരു ആൺകുട്ടിയും രണ്ട് പെൺമക്കൾ കൂടിയുണ്ട്. 37 വർഷമായി ദമ്മാമിലെ ഒരു പ്രമുഖ സ്ഥാപനത്തിൽ ചീഫ് അക്കൗണ്ടൻ്റായി പ്രവർത്തിച്ച് വരികയാണ്. ഒരു മാസം മുമ്പാണ് നാട്ടിൽ നിന്നും ലീവ് കഴിഞ്ഞെത്തിയത്.
നിയമ നടപടികൾക്കും മൃതദേഹം വിട്ടുകിട്ടാനും വേണ്ടി മകൻ്റെ പേരിലായിരുന്നു ഭാര്യ വക്കാലത്ത് കൊടുത്തിരുന്നത്. അസർ നമസ്കാരാനന്തരം ഇബ്നു അബ്ബാസ് മസ്ജിദിൽ നടന്ന മയ്യത്ത് നമസ്കാരത്തിന് ശേഷം സെയിൽ കബീർ ജുഫാലി ഖബർസ്ഥാനിൽ മറവ് ചെയ്തു. കെഎംസിസി നേതാക്കളായ സലാം പുല്ലാളൂർ, ഹമീദ് പെരുവള്ളൂർ ദമ്മാമിൽ നിന്നെത്തിയ ബന്ധുക്കൾ സുഹൃത്തുക്കൾ തുടങ്ങി നിരവധി പേർ ഖബറടക്ക ചടങ്ങിൽ പങ്കെടുത്തു. എംബസിയുമായി ബന്ധപ്പെട്ട നടപടിക്രമങ്ങൾക്കും നിയമനടപടികൾ പൂർത്തിയാക്കാനും താഇഫ് കെഎംസിസി സെൻട്രൽ കമ്മിറ്റി പ്രസിഡന്റും സി.സി.ഡബ്ലിയു മെമ്പറുമായ നാലക്കത്ത് മുഹമ്മദ് സ്വാലിഹ് സാഹിബ് രംഗത്തുണ്ടായിരുന്നു.
നടപടിക്രമങ്ങൾ വേഗത്തിൽ പൂർത്തിയാക്കാൻ അത്യുൽസാഹത്തോടെ പ്രവർത്തിച്ച ഇന്ത്യൻ കോൺസുലേറ്റ് അധികൃതർക്കും കൂടെ നിന്ന് സഹായിച്ച നാലകത്ത് മുഹമ്മദ് സ്വാലിഹിനും മുഷ്താഖ് മുഷ്താഖ് അഹമ്മദിൻ്റെ കുടുംബം നന്ദി അറിയിച്ചു.