ഗാസ – ഗാസയില്‍ അഞ്ച് വയസിന് താഴെയുള്ള 2,700 ലേറെ കുട്ടികള്‍ കടുത്ത പോഷകാഹാരക്കുറവ് അനുഭവിക്കുന്നതായി ഐക്യരാഷ്ട്രസഭയുടെ ഫലസ്തീന്‍ അഭയാര്‍ഥി ദുരിതാശ്വാസ, പ്രവര്‍ത്തന ഏജന്‍സി അറിയിച്ചു. പരിമിതമായ മെഡിക്കല്‍ സേവനങ്ങള്‍ കണക്കിലെടുക്കുമ്പോള്‍ അതിവേഗം വഷളാകുന്ന മാനുഷിക സാഹചര്യത്തിന്റെ അപകടകരമായ സൂചനയാണിത്. ഉത്തര ഗാസയില്‍ ഒരു മെഡിക്കല്‍ കേന്ദ്രം മാത്രമേ ഭാഗികമായി പ്രവര്‍ത്തിക്കുന്നുള്ളൂ. ഇന്ധന വിതരണം വളരെ കുറവാണ്. ഇത് ദിവസങ്ങള്‍ക്കുള്ളില്‍ എല്ലാ മാനുഷിക, മെഡിക്കല്‍ സേവനങ്ങളും നിര്‍ത്താന്‍ ഇടയാക്കുമെന്ന് ഫലസ്തീന്‍ ന്യൂസ് ഏജന്‍സി പറഞ്ഞു.
മറ്റു യു.എന്‍ ഏജന്‍സികളുമായി സഹകരിച്ച് റിലീഫ് വിതരണം വിപുലീകരിക്കാനുള്ള സന്നദ്ധത ഫലസ്തീന്‍ അഭയാര്‍ഥി ദുരിതാശ്വാസ, പ്രവര്‍ത്തന ഏജന്‍സി വ്യക്തമാക്കി. തങ്ങള്‍ക്കെതിരെയുള്ള ആരോപണങ്ങള്‍ സംബന്ധിച്ച് സഹകരിക്കാനും തെളിവുകള്‍ നല്‍കാനും യു.എന്‍ ഏജന്‍സി ഇസ്രായിലിനോട് ആവശ്യപ്പെട്ടു. ആവര്‍ത്തിച്ചുള്ള അഭ്യര്‍ഥനകള്‍ നടത്തിയിട്ടും 20 മാസത്തിലേറെയായി ഇസ്രായിലിന്റെ ഭാഗത്തു നിന്ന് യാതൊരു പ്രതികരണവും ലഭിച്ചിട്ടില്ലെന്ന് യു.എന്‍ റിലീഫ് ഏജന്‍സി പറഞ്ഞു.
ഭക്ഷണം ലഭിക്കാനായി ജീവന്‍ പണയപ്പെടുത്താന്‍ ഗാസയിലെ സാധാരണക്കാരെ നിര്‍ബന്ധിക്കരുതെന്ന് ഐക്യരാഷ്ട്രസഭയുടെ ഹ്യുമാനിറ്റേറിയന്‍ അഫയേഴ്‌സ് ഏകോപന ഓഫീസ് പറഞ്ഞു. ആവശ്യമായ സാഹചര്യങ്ങള്‍ ഒരുക്കുകയാണെങ്കില്‍ മാനുഷിക തത്വങ്ങള്‍ക്കനുസൃതമായി ജീവന്‍ രക്ഷാ സഹായം നല്‍കാനുള്ള സന്നദ്ധത യു.എന്‍ ഹ്യുമാനിറ്റേറിയന്‍ അഫയേഴ്‌സ് ഏകോപന ഓഫീസ് വ്യക്തമാക്കി.