മക്ക – കടുത്ത തിരക്കും ഉയര്‍ന്ന സഞ്ചാരവും കണക്കിലെടുത്ത് ഹജ് കര്‍മങ്ങള്‍ക്കിടെ അണുബാധ ഒഴിവാക്കാന്‍ തീര്‍ഥാടകര്‍ വ്യക്തിശുചിത്വം പാലിക്കേണ്ടത് ഏറെ പ്രധാനമാണെന്ന് ലൈവ് ഹെല്‍ത്തി ബോധവല്‍ക്കരണ പ്ലാറ്റ്ഫോമിലൂടെ ആരോഗ്യ മന്ത്രാലയം പറഞ്ഞു.
ഓരോ കര്‍മങ്ങള്‍ക്കും ശേഷം ദിവസവും കുളിക്കല്‍, ടവലുകള്‍, ടൂത്ത് ബ്രഷുകള്‍ തുടങ്ങിയ വ്യക്തിഗത വസ്തുക്കള്‍ മറ്റുള്ളവരുമായി പങ്കിടുന്നത് ഒഴിവാക്കല്‍ എന്നിവയാണ് വ്യക്തിശുചിത്വം പാലിക്കാന്‍ പിന്തുടരേണ്ട ഏറ്റവും പ്രധാനപ്പെട്ട പെരുമാറ്റരീതികള്‍. വ്യക്തിഗത വസ്തുക്കള്‍ മറ്റുള്ളവരുമായി പങ്കിടുന്നത് അണുബാധ എളുപ്പത്തില്‍ പകരാന്‍ കാരണമാകും. പതിവായി സ്പര്‍ശിക്കുന്ന പ്രതലങ്ങള്‍ വൃത്തിയാക്കേണ്ടതും വായ-ദന്ത ശുചിത്വം പതിവായി പാലിക്കേണ്ടതും അനിവാര്യമാണ്.
പുണ്യസ്ഥലങ്ങളില്‍ ആരോഗ്യകരമായ അന്തരീക്ഷം നിലനിര്‍ത്താനും എല്ലാവരുടെയും സുരക്ഷ വര്‍ധിപ്പിക്കാനും സഹായിക്കുന്ന നിലക്ക് പ്രത്യേകം നിശ്ചയിച്ച കുപ്പത്തൊട്ടികളില്‍ മാത്രം മാലിന്യം ഉപേക്ഷിക്കണമെന്നും ആരോഗ്യ മന്ത്രാലയം പറഞ്ഞു.
തീര്‍ഥാടകര്‍ക്കിടയില്‍ ആരോഗ്യ, പ്രതിരോധ അവബോധം വളര്‍ത്താനും പകര്‍ച്ചവ്യാധികളും പെരുമാറ്റ അപകടസാധ്യതകളും ഇല്ലാത്ത സുരക്ഷിതവും ആരോഗ്യകരവുമായ ഹജ് സീസണ്‍ ഉറപ്പാക്കാനും ലക്ഷ്യമിടുന്ന ലൈവ് ഹെല്‍ത്തി കാമ്പെയ്നിന്റെ ഭാഗമായാണ് അണുബാധ ഒഴിവാക്കാന്‍ തീര്‍ഥാടകര്‍ വ്യക്തിശുചിത്വം പാലിക്കണമെന്ന് മന്ത്രാലയം നിര്‍ദേശിച്ചത്.