ജിദ്ദ : നാല് നാൾ നീണ്ടു നിന്ന ആവേശകരമായ ലോക മോട്ടോർ റാലി ചാമ്പ്യൻഷിപ്പ് മത്സരങ്ങൾക്ക് ഇന്നലെ ജിദ്ദയിൽ കൊടിയിറങ്ങിയപ്പോൾ മലയാളിയായ മൂസാ ഷെരീഫും ഹൈദരാബാദ് സ്വദേശി നവീൻ പുല്ലിഗിലയും ഇന്ത്യയുടെ അഭിമാനക്കൊടി ഉയർത്തി രണ്ടാം സ്ഥാനത്തെത്തി. വേൾഡ് റാലി ചാമ്പ്യൻഷിപ്പിന്റെ ( ഡബ്ലിയു. ആർ. സി ) കാറ്റഗറി ത്രീ വിഭാഗത്തിലാണ് ഇരുവരും മത്സരിച്ച് വിജയത്തിലേക്ക് കുതിച്ചത്.
ഇരുവരും ടാൻസാനിയൻ കാർ റാലിയിലുൾപ്പെടെ നിരവധി റാലികളിൽ ഒരുമിച്ച് ഇന്ത്യൻ ബാനറിൽ കാറോടിച്ചിട്ടുണ്ട്. നവംബർ 26 ന് തുടങ്ങി 30 ന് ജിദ്ദയിൽ സമാപിച്ച മത്സരം 17 ട്രാക്കുകളിലായിരുന്നു. 320 കിലോമീറ്റർ ദൂരമാണ് ലോകത്തിന്റെ വിവിധ ഭാഗങ്ങളിൽ നിന്നെത്തിയ താരങ്ങൾ കാറുകൾ ‘പറത്തിയത് ‘. വേൾഡ് റാലി ചാമ്പ്യൻ ഷിപ്പിൽ ഈ പദവിയിലെത്തുന്ന ആദ്യ ഇന്ത്യൻ ടീം അംഗങ്ങളാണ് മൂസാ ഷെരീഫും നവീനും.
‘ആവേശവും ആഹ്ലാദവും പകർന്ന ഈ മത്സരത്തിൽ പങ്കെടുക്കാനും രണ്ടാം സ്ഥാനം നേടാനും സാധിച്ചത് വലിയ ഭാഗ്യമാണ്. സൗദിയിലെ കാറോട്ടം പുതിയ അനുഭവങ്ങളാണ് സമ്മാനിച്ചത്. കുന്നും മലകളും മരുഭൂമിയും താണ്ടിയുള്ള കാറോട്ടം ത്രില്ലിങ്ങായിരുന്നു.
ഇന്ത്യൻ മോട്ടോർ സ്പോർട്സിന്റെ ചരിത്രത്തിൽ തീർച്ചയായും ഇത് അഭിമാന നിമിഷമാണ്. നാല് മണിക്കൂർ 28 മിനുട്ട് കൊണ്ട് ഫിനിഷ് ചെയ്താണ് ഞങ്ങൾ രണ്ട് പേരും വിജയത്തിലെത്തിയത്- ഈ വിജയം നമ്മുടെ രാജ്യത്തിന് സമർപ്പിക്കുന്നു- കാസർകോട് മൊഗ്രാൽ സ്വദേശിയായ മൂസാ ഷെരീഫ് ‘ദ മലയാളം ന്യൂസി’ നോട് പറഞ്ഞു. ബെൽജിയം താരങ്ങളായ തിയാറി ന്യൂവില്ലെയും മാർട്ടിൻ വൈസേഗയുമാണ് വേൾഡ് റാലി ചാമ്പ്യൻഷിപ്പിൽ ഒന്നാം സ്ഥാനം കരസ്ഥമാക്കിയത്. ഈ രംഗത്ത് 33 വർഷത്തെ വൈവിധ്യം നിറഞ്ഞ അനുഭവങ്ങളുള്ള മൂസാ ഷെരീഫ് അടുത്ത ലോക റാലിക്കുള്ള തയ്യാറെടുപ്പിലാണ്. മത്സരം കഴിഞ്ഞ് ഇന്നലെ രാത്രി ഉംറ നിർവഹിച്ച അദ്ദേഹം നാളെ കാലത്ത് മംഗലാപുരം വഴി നാട്ടിലേക്ക് മടങ്ങും. നവീൻ ഹൈദരാബാദിലേക്ക് മടങ്ങി. കെ. എം. സഫീനയാണ് മൂസാ ഷെരീഫിന്റെ പത്നി. മക്കൾ : സൈനുൽ സാലിഹ്, മുഹമ്മദ് ഫലാഹ്, സമാഹ് ഫാത്തിമ.