ബുറൈദ: സ്വദേശി പൗരന്റെ വാഹനമിടിച്ച് ഗുരുതരമായി പരിക്കേറ്റ് ചികിത്സയിലായിരുന്ന വയനാട് സ്വദേശി മരിച്ചു. ബുറൈദയിൽ തയ്യൽ ജോലി ചെയ്തു വരികയായിരുന്ന സുൽത്താൻ ബത്തേരി സ്വദേശി കൊക്കനാടൻ വീട്ടിൽ മുഹമ്മദ് റാഫി (54) ആണ് മരിച്ചത്. അമിത വേഗതയിൽ പിറകിലേക്ക് എടുത്ത സ്വദേശി പൗരന്റെ വാഹനമിടിച്ച് ഗുരുതരമായി പരുക്കേറ്റ റാഫി ബുറൈദ സെൻട്രൽ ആശുപത്രിയിൽ ചികിത്സയിലിരുന്നു. കഴിഞ്ഞ മാസം 28ന് രാത്രി സുഹൃത്തിനൊപ്പം ബുറൈദ ദാഹിലിയ മാർക്കറ്റിൽ നിന്ന് അവശ്യസാധനങ്ങൾ വാങ്ങി മടങ്ങവെയായിരുന്നു അപകടം. കൂടെയുണ്ടായിരുന്ന സുഹൃത്ത് ചെറിയ പരിക്കോടെ രക്ഷപ്പെട്ടു.
ഖസീം പ്രവാസി സംഘം ഷാര സന യൂണിറ്റ് അംഗമായിരുന്ന റാഫി പ്രദേശത്തെ സ്വദേശികൾക്കും വിദേശികൾക്കുമിടയിൽ ഒരുപോലെ സ്വീകാര്യതയുള്ള വ്യക്തികൂടിയായിരുന്നു. പ്രവാസി സംഘം ജീവകാരുണ്യ വിഭാഗത്തിന്റെ നേതൃത്വത്തിൽ നിയമ നടപടികൾ പൂർത്തിയാക്കിയ ശേഷം മൃതദേഹം വൻ ജനാവലിയുടെ സാന്നിധ്യത്തിൽ ബുറൈദ ഖലീജ് ഖബറിസ്ഥാനിൽ മറവ് ചെയ്തു.
കൊക്കനാടൻ വീട്ടിൽ മുഹമ്മദ് മരക്കാർ – ഖദീജ മുഹമ്മദ് ദമ്പതികളുടെ മകനാണ്. ഭാര്യ ഹാജറ. മക്കൾ: അനസ്, അനീഷ്, റഫാൻ.