മിനാ – സൂര്യാഘാതം അടക്കം കടുത്ത ചൂട് മൂലമുള്ള ആരോഗ്യ പ്രശ്‌നങ്ങള്‍ കഴിഞ്ഞ വര്‍ഷത്തെ അപേക്ഷിച്ച് ഇത്തവണ 90 ശതമാനം തോതില്‍ കുറഞ്ഞതായി ആരോഗ്യ മന്ത്രാലയം അറിയിച്ചു. പ്രതിരോധ പ്രവര്‍ത്തനങ്ങള്‍ മെച്ചപ്പെടുത്തിയതിന്റെയും ആരോഗ്യ അവബോധം വര്‍ധിപ്പിച്ചതിന്റെയും ഫലമായും ആരോഗ്യ മേഖലയും സര്‍ക്കാര്‍ വകുപ്പുകളും തമ്മിലുള്ള ഏകോപനം മൂലവുമാണ് ഈ നേട്ടം കൈവരിക്കാന്‍ സാധിച്ചത്. കടുത്ത ചൂട് മൂലമുള്ള ആരോഗ്യ പ്രശ്‌നങ്ങളില്‍ നിന്ന് തീര്‍ഥാടകരെ സംരക്ഷിക്കാനും, കര്‍മങ്ങള്‍ എളുപ്പത്തിലും മനസ്സമാധാനത്തോടെയും നിര്‍വഹിക്കാന്‍ അവരെ പ്രാപ്തരാക്കാനും ഈ ശ്രമങ്ങള്‍ സഹായിച്ചതായും ആരോഗ്യ മന്ത്രാലയം പറഞ്ഞു.
ഉയര്‍ന്ന താപനില കണക്കിലെടുക്ക് നേരിട്ട് വെയിലേല്‍ക്കുന്ന സാഹചര്യം തീര്‍ഥാടകര്‍ ഒഴിവാക്കണമെന്നും അറഫ ദിനത്തില്‍ രാവിലെ പത്തു മുതല്‍ വൈകീട്ട് നാലു വരെ തമ്പുകളില്‍ തന്നെ കഴിയണമെന്നും പുണ്യസ്ഥലങ്ങളില്‍ പകല്‍ സമയത്ത് കുടകള്‍ ഉപയോഗിക്കണമെന്നും ധാരാളം വെള്ളം കുടിക്കണമെന്നും നഗ്നപാദരായി നടക്കരുതെന്നും ആരോഗ്യ മന്ത്രാലയം ആവശ്യപ്പെട്ടിരുന്നു.
സാധ്യമായത്ര ചൂട് കുറക്കാനും തീര്‍ഥാടകര്‍ക്ക് ആശ്വാസം നല്‍കാനും പുണ്യസ്ഥലങ്ങളില്‍ മിസ്റ്റിംഗ് ഫാനുകളും വാട്ടര്‍ സ്‌പ്രേകളും സ്ഥാപിക്കുകയും തണല്‍മരങ്ങള്‍ നട്ടുവളര്‍ത്തുകയും തണല്‍കുടകള്‍ സ്ഥാപിക്കുകയും റോഡുകളില്‍ വെള്ള പെയിന്റ് അടിക്കുകയും റബ്ബര്‍ ടാറിംഗ് നടത്തുകയും ചെയ്തിരുന്നു. ഇതോടൊപ്പമുള്ള ശക്തമായ ബോധവല്‍ക്കരണമാണ് ഹാജിമാര്‍ക്കിടയില്‍ കടുത്ത ചൂട് മൂലമുള്ള ആരോഗ്യ പ്രശ്‌നങ്ങള്‍ കുറക്കാന്‍ സഹായിച്ചത്.