ജിദ്ദ: ജിദ്ദ കെഎംസിസി സെൻട്രൽ കമ്മിറ്റി സംഘടിപ്പിക്കുന്ന “ഇ. അഹമ്മദ് സ്മാരക സൂപ്പർ സെവൻസ്” ഫുട്ബോൾ ടൂർണമെന്റിന്റെ പോസ്റ്റർ പ്രകാശനം നടന്നു. സെപ്റ്റംബർ 19-ന് ഖാലിദ് ബിൻ വലീദ് അൽ റുസൂഖ് സ്റ്റേഡിയത്തിൽ വർണാഭമായ മാർച്ച് പാസ്റ്റോടെ ആരംഭിക്കുന്ന ടൂർണമെന്റിന്റെ പോസ്റ്റർ ജിദ്ദ കെഎംസിസി ജനറൽ സെക്രട്ടറി വി.പി. മുസ്തഫ, സിഫ് ജനറൽ സെക്രട്ടറി നിസാം മമ്പാടിന് കൈമാറി പ്രകാശനം നിർവഹിച്ചു. എബിസി കാർഗോ, അൽ വഫ സൂപ്പർമാർക്കറ്റ്, ജീപാസ് എന്നിവയുടെ പ്രതിനിധികളും ജിദ്ദയിലെ കെഎംസിസി നേതാക്കളും ചടങ്ങിൽ പങ്കെടുത്തു.
സൗദിയിലെ പ്രമുഖ ക്ലബ്ബുകളും ജിദ്ദയിലെ വിവിധ ജില്ലാ കെഎംസിസി ടീമുകളും മത്സരിക്കുന്ന ടൂർണമെന്റ് ഒക്ടോബർ 10-ന് ഫൈനൽ മത്സരത്തോടെ സമാപിക്കും. വഫ ഹൈപ്പർമാർക്കറ്റ് സ്പോൺസർ ചെയ്യുന്ന ഒന്നാം സമ്മാനമായ ബുള്ളറ്റ് മോട്ടോർസൈക്കിൾ, എ.സി., ടി.വി. തുടങ്ങിയവ ലക്കി ഡ്രോയിലൂടെ വിതരണം ചെയ്യും. എല്ലാ മത്സര ദിനങ്ങളിലും പ്രത്യേക ലക്കി ഡ്രോകൾ ഉണ്ടാകും. ജിദ്ദയിലെ കെഎംസിസി ജില്ല, ഏരിയ, മണ്ഡലം, പഞ്ചായത്ത് കമ്മിറ്റികൾ സോഷ്യൽ മീഡിയ വഴി പ്രചാരണം ഏറ്റെടുത്ത് പ്രവാസി സമൂഹത്തിന്റെ വൻ പങ്കാളിത്തം ഉറപ്പാക്കും.
ആക്ടിങ് പ്രസിഡന്റ് സി.കെ.എ. റസാഖ് മാസ്റ്ററുടെ അധ്യക്ഷതയിൽ നടന്ന ചടങ്ങ് സൗദി നാഷണൽ കമ്മിറ്റി വൈസ് പ്രസിഡന്റ് നിസാം മമ്പാട് ഉദ്ഘാടനം ചെയ്തു. കൂപ്പൺ വിതരണം സി.കെ.എ റസാക്ക് മാസ്റ്റര്‍ ജാമിയ കുവൈസ കെഎംസിസി പ്രസിഡന്റ് കോയ, അനാകിഷ് ഏരിയ പ്രസിഡന്റ് കെ. ബഷീർ എന്നിവർക്ക് നൽകി. ഷൗക്കത്ത് ഞാറക്കോടൻ, സുബൈർ വട്ടോളി എന്നിവർ മത്സര വിശദാംശങ്ങൾ വിശദീകരിച്ചു. സിയാദ് വി.കെ., വി.പി. ഷിമിൽ, ഇസ്മായിൽ മുണ്ടക്കുളം, നാണി ഇസ്ഹാഖ്, ടി.കെ. അബ്ദുൽ റഹിമാൻ, നൗഷാദ് ചപ്പാരപ്പടവ്, മനാഫ് ഏറാഡ് എന്നിവർ ആശംസകൾ അർപ്പിച്ചു. വി.പി. മുസ്തഫ സ്വാഗതവും ഇസ്ഹാഖ് പൂണ്ടോളി നന്ദിയും പറഞ്ഞു. എ.കെ. ബാവ, ലത്തീഫ് മുസ്ലിയാരങ്ങാടി, നാസർ മച്ചിങ്ങൽ, സാബിൽ മമ്പാട്, ജലാൽ തേഞ്ഞിപ്പലം, ഷക്കീർ മണ്ണാർക്കാട്, അഷ്‌റഫ് താഴെക്കോട് എന്നിവർ ചടങ്ങിന് നേതൃത്വം നൽകി.