ജിദ്ദ– സൗദി അറേബ്യയിലെ ഡെലിവറി മേഖല ഈ വർഷത്തിന്റെ ആദ്യ മൂന്ന് മാസങ്ങളിൽ വൻ വളർച്ച കൈവരിച്ചതായി ട്രാൻസ്പോർട്ട് ജനറൽ അതോറിറ്റി അറിയിച്ചു. കഴിഞ്ഞ വർഷത്തെ അപേക്ഷിച്ച് 49 ശതമാനത്തിന്റെ വർധനവാണ് ഈ മേഖലയിലുണ്ടായത്. ജനുവരി മുതൽ മാർച്ച് വരെയുള്ള കാലയളവിൽ മാത്രം 1.18 കോടിയിലധികം ഓർഡറുകളാണ് രാജ്യത്തുടനീളം വിതരണം ചെയ്തത്. ഇ-കൊമേഴ്സ് രംഗത്തെ ഉണർവും നൂതന സാങ്കേതിക വിദ്യകളുടെ ഉപയോഗവുമാണ് ഈ നേട്ടത്തിന് പിന്നിലെ പ്രധാന ഘടകങ്ങൾ. ഇത് സേവനങ്ങളുടെ നിലവാരം ഉയർത്താനും ഉപഭോക്താക്കൾക്ക് കൂടുതൽ മികച്ച അനുഭവം നൽകാനും സഹായിച്ചിട്ടുണ്ട്.
രാജ്യത്തെ വിവിധ പ്രവിശ്യകളിൽ റിയാദാണ് ഓർഡറുകളുടെ എണ്ണത്തിൽ ഒന്നാമത് നിൽക്കുന്നത്. ആകെ ഡെലിവറികളുടെ 44 ശതമാനവും റിയാദ് പ്രവിശ്യയിലായിരുന്നു. 22.21 ശതമാനം ഓർഡറുകളുമായി മക്ക പ്രവിശ്യ രണ്ടാം സ്ഥാനത്തും, 16.23 ശതമാനവുമായി കിഴക്കൻ പ്രവിശ്യ മൂന്നാം സ്ഥാനത്തും എത്തി. നഗരപ്രദേശങ്ങളിൽ മാത്രമല്ല, രാജ്യത്തിന്റെ വിദൂര ഭാഗങ്ങളിലേക്കും ഡെലിവറി സേവനങ്ങൾ അതിവേഗം വ്യാപിക്കുന്നതായാണ് കണക്കുകൾ സൂചിപ്പിക്കുന്നത്.
മറ്റ് പ്രവിശ്യകളിലെ കണക്കുകൾ പരിശോധിച്ചാൽ മദീന (4.97%), അസീർ (3.34%), അൽഖസീം (2.77%), തബൂക്ക് (1.74%), ഹായിൽ (1.66%) എന്നിങ്ങനെയാണ് ഡെലിവറി നിരക്ക്. ജിസാൻ (1.14%), നജ്റാൻ (0.65%), അൽജൗഫ് (0.64%), ഉത്തര അതിർത്തി പ്രവിശ്യ (0.51%), അൽബാഹ (0.18%) എന്നീ മേഖലകളിലും ഡെലിവറി സേവനങ്ങൾ സജീവമാണ്. ചുരുങ്ങിയ കാലയളവിനുള്ളിൽ രാജ്യത്തെ എല്ലാ പ്രദേശങ്ങളിലേക്കും ഓൺലൈൻ ഓർഡർ വിതരണ സംവിധാനം വിജയകരമായി വ്യാപിപ്പിക്കാൻ കഴിഞ്ഞതായും റിപ്പോർട്ടുകൾ വ്യക്തമാക്കുന്നു.