ജിദ്ദ – ടൂറിസം മേഖലയില്‍ ജീവനക്കാര്‍ക്ക് പരിശീലനം നല്‍കുന്നതില്‍ സൗദി അറേബ്യ ലോകത്ത് ഏറ്റവും മുന്നിലാണെന്ന് ടൂറിസം മന്ത്രി അഹ്മദ് അല്‍ഖത്തീബ് പറഞ്ഞു.
ആഗോള ടൂറിസത്തിന് കൂടുതല്‍ സുസ്ഥിരമായ ഭാവിയിലേക്ക് റിയാദ് ലോകത്തെ ഒന്നിപ്പിക്കുകയാണെന്ന്, കൃത്രിമബുദ്ധിയാല്‍ പ്രവര്‍ത്തിക്കുന്ന ടൂറിസം: ഭാവിയെ പുനര്‍നിര്‍വചിക്കല്‍ എന്ന വിഷയത്തില്‍ നടന്ന യു.എന്‍ ടൂറിസം ഓര്‍ഗനൈസേഷന്‍ 26-ാമത് ജനറല്‍ അസംബ്ലി ഉദ്ഘാടന വേളയില്‍ അഹ്മദ് അല്‍ഖത്തീബ് പറഞ്ഞു. 150 ലേറെ രാജ്യങ്ങളില്‍ നിന്നുള്ള പ്രതിനിധികളുടെ പങ്കാളിത്തത്തോടെ, സംഘടനയുടെ 50 വര്‍ഷത്തെ ചരിത്രത്തിലെ ഏറ്റവും വലിയ സെഷനാണ് സൗദി അറേബ്യ ആതിഥേയത്വം വഹിക്കുന്നത്.
ടൂറിസം പ്രൊഫഷണലുകളെ പരിശീലിപ്പിക്കുന്നതില്‍ ആഗോളതലത്തില്‍ ഒന്നാമതെത്താന്‍ മനുഷ്യവിഭവശേഷി വികസിപ്പിക്കുന്നതിന്റെ പ്രാധാന്യം സൗദി അറേബ്യ നേരത്തെ തന്നെ തിരിച്ചറിഞ്ഞിരുന്നു. ശേഷികള്‍ പരിപോഷിപ്പിക്കാനുള്ള അന്താരാഷ്ട്ര ശ്രമങ്ങള്‍ക്കും രാജ്യം നേതൃത്വം നല്‍കുന്നു. ടൂറിസം മേഖലയിലെ ഗുണനിലവാരമുള്ള അവസരങ്ങളിലൂടെ യുവാക്കളെയും സ്ത്രീകളെയും ശാക്തീകരിക്കാനും ദേശീയ സമ്പദ്വ്യവസ്ഥയില്‍ അവരുടെ സംഭാവന വര്‍ധിപ്പിക്കാനും രാജ്യം പ്രവര്‍ത്തിക്കുന്നു.
അഭിവൃദ്ധി പ്രാപിക്കുന്ന സമൂഹങ്ങള്‍, കൃത്രിമബുദ്ധി, മനുഷ്യ ആരോഗ്യം എന്നീ മൂന്ന് പ്രധാന കേന്ദ്ര വിഷയങ്ങളെ അടിസ്ഥാനമാക്കിയുള്ള എക്സ്പോ 2030 ന് ആതിഥേയത്വം വഹിക്കാന്‍ റിയാദ് അഭിമാനത്തോടെ തയാറെടുക്കുകയാണ്. എക്സ്പോ സൗദി തലസ്ഥാനത്തേക്ക് നാലു കോടിയിലേറെ സന്ദര്‍ശകരെ ആകര്‍ഷിക്കുമെന്ന് പ്രതീക്ഷിക്കുന്നു. ലോകത്തെ ഒന്നിപ്പിക്കുന്ന റിയാദില്‍ നിന്ന്, മാനവികതയുടെയും പങ്കിട്ട ഭാവിയുടെയും പ്രയോജനത്തിനായി യു.എന്‍ ടൂറിസം ഓര്‍ഗനൈസേഷനുമായി പ്രവര്‍ത്തിക്കാനുള്ള ഞങ്ങളുടെ പ്രതിബദ്ധത ഞങ്ങള്‍ വ്യക്തമാക്കുന്നു.
ആധുനിക ടൂറിസം വ്യവസായത്തിന്റെ പ്രധാന ചാലകശക്തികള്‍ ഇന്നൊവേഷനും കൃത്രിമബുദ്ധിയും ആണ്. പൊതു, സ്വകാര്യ മേഖലകള്‍ തമ്മിലുള്ള തന്ത്രപരമായ പങ്കാളിത്തത്തിലൂടെ ടൂറിസ്റ്റുകളുടെ അനുഭവം മെച്ചപ്പെടുത്താനും പ്രവര്‍ത്തന കാര്യക്ഷമത കൈവരിക്കാനും സാങ്കേതികവിദ്യയും ഇന്നൊവേഷനും പ്രയോജനപ്പെടുത്താന്‍ സൗദി അറേബ്യ പ്രവര്‍ത്തിക്കുന്നു. ഗള്‍ഫ് മേഖലയില്‍ യു.എന്‍ ടൂറിസം ഓര്‍ഗനൈസേഷന്റെ ഇത്തരത്തിലുള്ള ആദ്യത്തെ സമ്മേളനമാണിത്. സമ്മേളനത്തില്‍ ലോക രാഷ്ട്രങ്ങളുടെ പൊതുവായ താല്‍പ്പര്യങ്ങള്‍ പ്രതിഫലിപ്പിക്കുകയും ആഗോള സമ്പദ്വ്യവസ്ഥയെ പിന്തുണക്കുകയും ചെയ്യുന്ന സെഷനുകളും പ്രോഗ്രാമുകളും സൗദി അറേബ്യ തയാറാക്കിയിട്ടുണ്ട്.
ആഗോള സമ്പദ്വ്യവസ്ഥയുടെ മൂലക്കല്ലായി ടൂറിസം മാറിയിരിക്കുന്നു. ലോക രാജ്യങ്ങളുടെ മൊത്തം ആഭ്യന്തരോല്‍പാദനത്തിലേക്ക് ടൂറിസം മേഖല ഏകദേശം 11 ട്രില്യണ്‍ ഡോളര്‍ സംഭാവന ചെയ്യുന്നു. ലോകമെമ്പാടും 35.7 കോടിയിലേറെ തൊഴിലവസരങ്ങള്‍ ടൂറിസം മേഖല നല്‍കുന്നു. 2035 ആകുമ്പോഴേക്കും ഈ മേഖലയില്‍ 9.1 കോടി പുതിയ തൊഴിലവസരങ്ങള്‍ ആവശ്യമായി വരും. അടുത്ത ദശകത്തില്‍ ടൂറിസം മേഖലയില്‍ 4.3 കോടി തൊഴിലവസരങ്ങളുടെ കമ്മി പ്രതീക്ഷിക്കുന്നു. മേഖലയുടെ തുടര്‍ച്ചയായ വളര്‍ച്ചയും സുസ്ഥിരതയും ഉറപ്പാക്കാന്‍ മനുഷ്യ മൂലധനത്തിലും സാങ്കേതികവിദ്യയിലും നിക്ഷേപങ്ങള്‍ നടത്തേണ്ടതിന്റെ പ്രാധാന്യത്തിന് ഇത് അടിവരയിടുന്നതായും ടൂറിസം മന്ത്രി പറഞ്ഞു.