ദോഹ: കനത്ത വേനൽചൂടിനെത്തുടർന്ന് ജൂൺ 1 മുതൽ സെപ്റ്റംബർ 15 വരെ ഉച്ചസമയങ്ങളിൽ മോട്ടോർസൈക്കിൾ ഡെലിവറി സർവീസിന് ഖത്തർ തൊഴിൽ മന്ത്രാലയം വിലക്കേർപ്പെടുത്തി. രാവിലെ 10 മുതൽ ഉച്ചകഴിഞ്ഞ് 3:30 വരെ ഡെലിവറി സേവനങ്ങൾക്കായി മോട്ടോർസൈക്കിളുകൾ ഉപയോഗിക്കുന്നത് താൽക്കാലികമായി നിർത്തിവയ്ക്കുമെന്ന് മന്ത്രാലയം അറിയിച്ചു.
ഉഷ്ണസമ്മർദ്ദത്തിന്റെ അപകടസാധ്യതകളിൽനിന്ന് ഡെലിവറി തൊഴിലാളികളെ സംരക്ഷിക്കാൻ ലക്ഷ്യമിട്ടാണ് ഈ തീരുമാനം. ഈ സമയങ്ങളിൽ ഡെലിവറി കമ്പനികൾക്ക് കാറുകൾ മാത്രം ഉപയോഗിച്ച് സേവനങ്ങൾ നിർവഹിക്കാൻ അനുവാദമുണ്ടെന്നും മന്ത്രാലയം വ്യക്തമാക്കി.
നേരത്തെ, ജൂൺ 1 മുതൽ സെപ്റ്റംബർ 15 വരെ തുറസ്സായ സ്ഥലങ്ങളിൽ രാവിലെ 10 മുതൽ ഉച്ചകഴിഞ്ഞ് 3:30 വരെ ജോലി ചെയ്യുന്നതിന് മന്ത്രാലയം വിലക്കേർപ്പെടുത്തിയിരുന്നു. ബൈക്ക് ഡെലിവറി മേഖലയിൽ ആയിരക്കണക്കിന് തൊഴിലാളികൾ ജോലി ചെയ്യുന്നുണ്ട്. കടുത്ത ചൂടിൽ ജോലി ചെയ്യാൻ നിർബന്ധിതരായിരുന്ന തൊഴിലാളികൾക്ക് മന്ത്രാലയത്തിന്റെ ഈ പുതിയ തീരുമാനം വലിയ ആശ്വാസമാണ്.