ദോഹ- കേരള മുഖ്യമന്ത്രി പിണറായി വിജയൻ ഏകദിന ഔദ്യോഗിക സന്ദർശനാർത്ഥം ഒക്ടോബർ 30ന് ഖത്തറിൽ എത്തും.
ഖത്തർ അധികാരികളുമായും ഖത്തറിലെ മലയാളി സമൂഹവുമായും, ബിസിനസ് രംഗത്തെ പ്രമുഖരുമായും മുഖ്യമന്ത്രി പിണറായി വിജയൻ കൂടിക്കാഴ്ച നടത്തുമെന്നാണ് കരുതുന്നത്. ഖത്തറിൽ മുഖ്യമന്ത്രി ഔദ്യോഗിക സന്ദർശനം പൂർത്തിയാക്കി ഒൿടോബർ 31ന് രാവിലെ തന്നെ തിരുവനന്തപുരത്തേക്ക് തിരിക്കും.
ലോക കേരള സഭ, മലയാളം മിഷന്‍ എന്നിവയുടെ നേതൃത്വത്തില്‍ വിവിധ മലയാളി സംഘടനകളുടെ സഹകരണത്തോടെയാണ് ഒക്ടോബർ 30ന് പൊതു സ്വീകരണം ഒരുക്കുക.വിവിധ സംഘടനകളുടെ പ്രതിനിധികൾ, സാംസ്കാരിക നേതാക്കൾ എന്നിവരടങ്ങുന്ന സമഗ്ര സംഘാടക സമിതി രൂപീകരിക്കുമെന്ന് ബന്ധപ്പെട്ടവര്‍ അറിയിച്ചു. കഴിഞ്ഞ 9 വർഷമായി പ്രവാസകാര്യ വകുപ്പിന്റെ ചുമതല കൂടി വഹിക്കുന്ന മുഖ്യമന്ത്രി പിണറായി വിജയൻ മുഖ്യമന്ത്രി പദവിയിലെത്തിയ ശേഷം ആദ്യമായാണ് ഖത്തർ സന്ദർശിക്കുന്നത്. നേരത്തെ സിപിഎം സംസ്ഥാന സെക്രട്ടറി ചുമതല വഹിച്ചപ്പോള്‍ അദ്ദേഹം ദോഹ സന്ദര്‍ശിച്ചിരുന്നു.
മുഖ്യമന്ത്രിയുടെ ബഹ്റൈൻ സന്ദർശനം ഈ മാസം 17ന് നടക്കും. മനാമയിലെ മലയാളി സമാജം ഹാളിലാണ് മുഖ്യമന്ത്രിയുടെ പരിപാടി.