ദോഹ– ഇന്ന് മുതൽ ഗൾഫ് രാജ്യങ്ങളിൽ നിന്നും ഹയ വിസയിൽ എത്തുന്നവർക്ക് ഖത്തറിൽ രണ്ട് മാസം താമസിക്കാം. എ.ടു വിസയിൽ എത്തുന്നവർക്കാണ് ഈ പുതിയ സൗകര്യം ഖത്തർ ടൂറിസം ഒരുക്കിയിരിക്കുന്നത്. എ.ടു വിസയിൽ എത്തുന്നവർക്ക് വിസ കാലാവധിക്കിടയിൽ രാജ്യത്തു നിന്ന് പുറത്ത് പോയാൽ അതെ വിസയിൽ തന്നെ റീഎൻട്രിയും അനുവദിക്കും. ഖത്തർ ആഭ്യന്തര മന്ത്രാലയവുമായി സഹകരിച്ചാണ് പുതിയ പരിഷ്ക്കാരം നടപ്പിലാക്കുന്നതെന്ന് ഖത്തർ ടൂറിസം അറിയിച്ചു. നാളെ മുതൽ ആരംഭിക്കുന്ന അറബ് കപ്പ് ഉൾപ്പെടെ അന്താരാഷ്ട്ര കായിക, സാംസ്കാരിക, വിനോദ പരിപാടികളാൽ സമ്പന്നമായ സീസണിൽ ഖത്തറിലേക്കുള്ള യാത്ര സുഗമവും സൗകര്യപ്രദവുമാക്കുന്നതിനാണ് പുതിയ പരിഷ്ക്കാരം ഹയ വിസയിൽ വരുത്തിയത്.
ഇന്ന് മുതൽ പ്രാബല്യത്തിൽ വരുന്ന പരിഷ്ക്കാരങ്ങൾ ജിസിസി രാജ്യങ്ങളിൽ നിന്നുള്ള സന്ദർശകർക്ക് രണ്ട് മാസം വരെ ഖത്തറിൽ തങ്ങാൻ അനുവദിക്കുകയും മൾട്ടിപ്പിൾ-എൻട്രി സൗകര്യവും നൽകുന്നുണ്ട് .പുതിയ വിസ പരിഷ്ക്കാരം അനുസരിച്ച് ജിസിസി നിവാസികൾക്ക് എളുപ്പത്തിൽ രാജ്യത്തേക്ക് വരാനും പുറത്തേക്ക് പോകാനും സാധിക്കും .