മസ്കറ്റ്– ഇന്ത്യൻ രൂപയുടെ മൂല്യം കൂപ്പുകുത്തിയതോടെ ഒമാൻ റിയാലിന്റെ വിനിമയ നിരക്ക് പുതിയ റെക്കോർഡ് സൃഷ്ടിച്ചു. പണമിടപാട് സ്ഥാപനങ്ങളിൽ ഒരു റിയാലിന് 230.15 രൂപയാണ് നിലവിലെ നിരക്ക്. രൂപയുടെ ഇടിവിന് പ്രധാന കാരണം അമേരിക്കയിലെ എച്ച്-1ബി വിസ നിരക്ക് കുത്തനെ വർധിപ്പിച്ചതാണെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.
അന്താരാഷ്ട്ര കറൻസി പോർട്ടലായ എക്സ്‌ചേഞ്ച് റേറ്റ് കൺവെർട്ടറിൽ ഒരു റിയാലിന്റെ വില 230 രൂപയിലധികമായി രേഖപ്പെടുത്തി. കഴിഞ്ഞ ഏതാനും ദിവസങ്ങളായി റിയാൽ രൂപയോട് ശക്തിപ്പെട്ടു നിന്നെങ്കിലും, സെപ്റ്റംബർ 23-ന് 230.154 രൂപയെന്നാണ് ഏറ്റവും ഉയർന്ന നിരക്ക്. യു.എസ് ഡോളറിനെതിരെ രൂപയുടെ വിനിമയ നിരക്ക് 88.41-ൽ നിന്ന് 88.79 വരെ ഉയർന്നു, അവസാനം 88.7550-ൽ സ്ഥിരമായിരിക്കുന്നത്. ഒരു ദിവസത്തെ ഏറ്റവും വലിയ മൂല്യനഷ്ടമാണിത്.
അമേരിക്കയിലെ ട്രംപ് ഭരണകൂടം എച്ച്-1ബി വിസയ്ക്ക് 100,000 ഡോളർ (ഏകദേശം 88 ലക്ഷം രൂപ) നിരക്ക് ഏർപ്പെടുത്തിയത് രൂപയുടെ ഇടിവിന് കാരണമായി. 50 ശതമാനം തീരുവ്, രാജ്യങ്ങൾ തമ്മിലുള്ള അസ്വാരസ്യങ്ങൾ എന്നിവയോടൊപ്പം ഈ പ്രഖ്യാപനം ഇന്ത്യൻ സാമ്പത്തിക മേഖലയിൽ വ്യാപകമായ പ്രതികൂലഫലങ്ങൾ ഉണ്ടാക്കുമെന്നാണ് വിദഗ്ധാഭിപ്രായം.
അതേസമയം, പണമിടപാട് സ്ഥാപനങ്ങളിൽ അസാധാരണ തിരക്കൊന്നും റിപ്പോർട്ട് ചെയ്തിട്ടില്ല. നിരക്ക് 229-ന് മുകളിലെത്തിയപ്പോൾ തന്നെ ഭൂരിഭാഗം പേരും നാട്ടിലേക്ക് പണമയച്ചു. നിരക്ക് ഇനിയും ഉയരാനുള്ള സാധ്യതയുണ്ടെന്ന് സാമ്പത്തിക വിദഗ്ധർ അഭിപ്രായപ്പെടുന്നു. അതിനാൽ, കൂടുതൽ ഉയർന്ന നിരക്കിനായി കാത്തിരിക്കുന്നവരും ഉണ്ട്.