റിയാദ്– റിയാദിലെ പ്രമുഖ വിദ്യാഭ്യാസ സ്ഥാപനമായ ഇന്ത്യൻ ഇന്റർനാഷണൽ സ്കൂൾ, റിയാദ് (IISR) പുതിയ പ്രിൻസിപ്പാളായി പ്രശസ്ത വിദ്യാഭ്യാസ പ്രവർത്തകയും സാമൂഹിക-സാംസ്കാരിക രംഗങ്ങളിലെ സജീവ സാന്നിധ്യവുമായ മൈമൂന അബ്ബാസ് ചുമതലയേറ്റു. കോഴിക്കോട് സ്വദേശിനിയായ മൈമൂന അബ്ബാസ് വിദ്യാഭ്യാസ രംഗത്തെ മികച്ച സംഭാവനകൾക്ക് അംഗീകാരമായി ഇന്ത്യൻ രാഷ്ട്രപതിയുടെ കയ്യിൽ നിന്ന് ദേശീയ മികച്ച അധ്യാപക അവാർഡ് നേടിയ വ്യക്തിയാണ്. ദീർഘകാല അധ്യാപന-ഭരണപരിചയവും വിദ്യാർത്ഥികേന്ദ്രിത വിദ്യാഭ്യാസ സമീപനവും അവരെ വിദ്യാഭ്യാസരംഗത്ത് ശ്രദ്ധേയയാക്കിയിട്ടുണ്ട്.
സ്കൂളിന്റെ അക്കാദമിക് നിലവാരം ഉയർത്തുന്നതിനും വിദ്യാർത്ഥികളുടെ സമഗ്ര വളർച്ച ലക്ഷ്യമിട്ടുള്ള നിരവധി നവീന പദ്ധതികൾ നടപ്പാക്കുന്നതിനും അവരുടെ നിയമനം സഹായകരമാകുമെന്ന പ്രതീക്ഷയിലാണ് രക്ഷിതാക്കളും വിദ്യാഭ്യാസ സമൂഹവും. മൈമൂന അബ്ബാസ് വിദ്യാഭ്യാസ രംഗത്തോടൊപ്പം സാമൂഹിക-സാംസ്കാരിക പ്രവർത്തനങ്ങളിലും സജീവ പങ്കാളിയാണ്. വിദ്യാർത്ഥികളുടെ വ്യക്തിത്വവികസനം, മൂല്യാധിഷ്ഠിത വിദ്യാഭ്യാസം, ആധുനിക പഠനരീതികൾ എന്നിവയിൽ പ്രത്യേക ശ്രദ്ധ പുലർത്തുന്ന വിദ്യാഭ്യാസപ്രവർത്തകയായി അവർ അറിയപ്പെടുന്നു.
പ്രിൻസിപ്പാളായി ചുമതലയേറ്റ ശേഷം സംസാരിച്ച മൈമൂന അബ്ബാസ് സ്കൂളിന്റെ വിദ്യാഭ്യാസ മികവും പാരമ്പര്യവും കൂടുതൽ ഉയരങ്ങളിലേക്ക് എത്തിക്കാൻ അധ്യാപകരുടെയും രക്ഷിതാക്കളുടെയും വിദ്യാർത്ഥികളുടെയും സഹകരണത്തോടെ പ്രവർത്തിക്കുമെന്ന് വ്യക്തമാക്കി. റിയാദ് ഇന്ത്യൻ ഇന്റർനാഷണൽ സ്കൂളിന്റെ പുതിയ അധ്യായത്തിന് നേതൃത്വം നൽകുന്ന മൈമൂന അബ്ബാസിന് പ്രവാസി ഇന്ത്യൻ സമൂഹം, സത്യം ഓൺലൈൻ, GMF ആശംസകൾ നേർന്നു